Yoxlama oyununda "Qarabağ"ın əvəzedici komandasını 2:0 hesabı ilə məğlub edən "Zirə"nin baş məşqçisi qarşılaşma barədə fikirlərini bildirib.
Sportnet.az xəbər verir ki, 37 yaşlı mütəxəssis Topaz Premyer Liqasında I tur matçında "Qarabağ"la oyunun təxirə salındığını xatırladıb. "İlk oyunumuz təxirə salındığından, bizə də oyun lazım idi. Sağ olsunlar, "Qarabağ"dan xahiş etdik, əvəzedici komanda ilə yoxlama oyunu keçirməyə razılıq verdilər. Həmçinin, əsas heyətdə şans qazanmayan futbolçuları bizimlə qarşılaşmaya göndərdilər. Normal oyun oldu. Bizə əsasən oyun tempi lazım idi ki, bunu əldə etdik. Bu həftəni oyunla başa vurmaq istəyirdik, buna nail olduq. Düzdü, zədələrimiz oldu, bunlar da futbolda baş verən hadisələrdir".
