"Neftçi" qış çempionu oldu, "Qarabağ", "Qəbələ" və "Sumqayıt"dan qələbə - YENİLƏNDİ

Azərbaycan Premyer Liqasında XIII tur başa çatıb.

Sportnet.az-ın məlumatına görə, 2020-ci ilin son turuna "Neftçi" - "Keşlə" matçı ilə yekun vurulub. Paytaxt derbisində 2:1 hesablı qələbə qazanan "ağ-qaralar" qış fasiləsinə lider kimi yollanıb.

İlk hissəsi qolsuz bitən matçda hesab ikinci yarıda açılıb. Meydan sahiblərinin heyətində Mirabdulla Abbasov fərqlənib. Amma "ağ-qaralar"ın sevinci cəmi 3 dəqiqə çəkib. Rəhman Hacıyev uzaq məsafədən vurduğu mükəmməl qolla tarazlığı bərpa edib. 80-ci dəqiqədə Abbasov dubl edərək, komandasına vacib xallar qazandırıb.

Beləliklə, bu qələbədən sonra xallarını 24-ə çatdıran "Neftçi" liderliyini qoruyub. "Keşlə" isə ili 13 xalla 7-ci sırada başa vurub.

Qeyd edək ki, bu gün keçirilmiş digər oyunlarda "Qarabağ"a "Zirə"yə 3:2, "Qəbələ" "Səbail"ə 3:1, "Sabah" isə "Sumqayıt"a 2:1 hesabı ilə qalib gəlib.

--------------------------------------------------

Azərbaycan Premyer Liqasında XIII turun daha 2 oyunu yekunlaşıb. 

Sportnet.az-ın məlumatına görə, "ASCO Arena"da "Səbail" "Qəbələ"ni, "Kapital Bank Arena"da isə "Sumqayıt" "Sabah"ı qəbul edib. Qarşılaşmalar qonaq komandaların qələbələri ilə yekunlaşıb. 

Bakıdakı görüşdə hesabı 20-ci dəqiqədə "Qəbələ"nin hücumçusu Ülvi İsgəndərov açıb. Bundan 7 dəqiqə sonra Asif Məmmədov fərqi artırıb. 52-ci dəqiqədə Turan Manafov fərqi azaltsa da, 90+2-ci dəqiqədə Ceyms Adeniyi yekun nəticəni müəyyənləşdirib - 3:1. 

Sumqayıtdakı görüşdə isə hesabı 26-cı dəqiqədə Slavik Alxasov açıb. 31-ci dəqiqədə meydan sahiblərinin futbolçusu Xəyal Nəcəfov bərabərlik qolunu vursa da, 65-ci dəqiqədə "Sabah"ın yarımmüdafiəçisi Aleksey İsayev dəqiq penalti zərbəsi ilə keçmiş komandasını məyus edib - 2:1. 

---------------------------------------------------

Azərbaycan Premyer Liqasında XIII turun bir oyunu başa çatıb.

Sportnet.az-ın məlumatına görə, "Qarabağ" evdə "Zirə" üzərində əzmkar qələbə qazanıb - 3:2.

Oyunda ilk qolu 2-ci dəqiqədə qonaqların heyətində Ağabala Ramazanov vurub. "Qartallar" 47-ci dəqiqədə növbəti dəfə meydan sahiblərini cəzalandırıblar. Bu dəfə Lazar Corceviç fərqlənib. 58-ci dəqiqədə Mahir Emreli fərqi azaldıb. 75-ci dəqiqədə "Zirə" meydanda azlıqda qalıb. Dmitrios Çantakias qırmızı vərəqə alaraq qovulub. 83-cü dəqiqədə "Qarabağ"ın heyətində Kvabena Ovusu hesabı bərabərləşdirib. Qanalı hücumçu 4 dəqiqə sonra dubl edib. 90+2-ci dəqiqədə Ağdam klubunun müdafiəçisi Kevin Medina qırmızı vərəqə görüb.

Bu qələbədən sonra xallarını 23-ə çatdıran "Qarabağ" liderliyə yüksəlib. "Zirə" isə 20 xalla 3-cü pillədə qalıb.

Hazırda davam edən matçlarda "Qəbələ" səfərdə "Səbail"ə, "Sabah" isə "Sumqayıt"a qalib gəlir.

Qeyd edək ki, tura "Neftçi" - "Keşlə" oyunu ilə yekun vurulacaq.

------------------------------------------------------------

Bu gün Azərbaycan Premyer Liqasında XIII turun oyunları keçiriləcək. Sportnet.az-ın məlumatına görə, qış fasiləsi öncəsi sonuncu turun bütün qarşılaşmaları eyni gündə gerçəkləşəcək.

20 xalla 2-3-cü yerləri bölüşən "Qarabağ" və "Zirə" "Azersun Arena"da münasibətlərinə aydınlıq gətirəcəklər. İndiyədək çempionatda 20 dəfə üz-üzə gəlmiş komandaların duelində Ağdam təmsilçisi 14 qələbə qazanıb. Rəqibini məğlub edə bilməyən "qartallar" yalnız 6 görüşdə heç-heçəyə nail olub. Topların fərqində də "köhlən atlar"ın üstünlüyü var - 43:8. "Zirə” son iki səfər matçında uduzmayıb.

XII turdan 10 xal toplayan və sonuncu pillədə qərarlaşan "Sabah" bu tur 16 xalla 4-cü pillədə yer alan "Sumqayıt"a qonaq olacaq. Bu, iki kollektiv arasında Premyer Liqada sayca 9-cu oyun olacaq. Əvvəlki 8 qarşılaşmanın 5-də meydan sahibləri, 2-də isə qonaqlar seviniblər. 1 görüş heç-heçə ilə yekunlaşıb. "Gənclik şəhəri" təmsilçisinin 13 qoluna Masazır klubu 7 topla cavab verib. Son üç matçda "Sabah" qalib gəlib. “Sumqayıt” son 6 oyunda meydanı qolsuz tərk etməyib.

Ötən tur qələbə sayəsində xallarını 13-ə çatdıraraq, 5-ci sıraya yüksələn "Səbail" "Qəbələ"ni qəbul edəcək. Hazırda əyalət təmsilçisi 12 xalla 7-ci pillədə yer alır. Komandalar bugünədək ölkə çempionatında 12 dəfə qarşılaşıblar. Meydan sahibləri bu görüşlərdən 3-də qalib gəlib. Qonaqların qələbə sayı isə 5-dir. 4 qarşılaşmada qalib müəyyənləşməyib. Bu matçlarda "dənizçilər" 13, "qırmızı-qaralar" 20 qol vurublar. “Qəbələ” son 6 matçda meydanı qolsuz tərk etməyib. “Səbail” evdəki son 5 görüşdə uduzmayıb.

Tura paytaxt derbisi ilə yekun vurulacaq. 21 xalla turnir cədvəlinə başçılıq edən "Neftçi" "Bakcell Arena"da "Keşlə" ilə qarşılaşacaq. "Ağ-qaralar" rəqibini məğlub edərək, fasiləyə qış çempionu kimi yollanmağa çalışacaq. Bu komandalar arasında indiyədək keçirilmiş 63 oyunun 33-də meydan sahibləri, 15-də qonaqlar qələbəni bayram ediblər. 15 matç bərabərliklə başa çatıb. Topların fərqi də flaqmanın xeyrinədir - 95:61. "Neftçi" son 2 oyunda qələbə qazanıb. "Keşlə" son 10 səfər qarşılaşmasında qalib gələ bilməyib.

24 dekabr (cümə axşamı)

Azərbaycan Premyer Liqası, XIII tur

16:00. “Səbail” – “Qəbələ” - 1:3

Qollar: Turan Manafov, 52 - Ülvi İsgəndərov, 20, Asif Məmmədov, 27, Ceyms Adeniyi, 90+2
Hakimlər: Əliyar Ağayev, Akif Əmirəli, Cavanşir Yusifov, Rövşən Rəcəbov
Hakim-inspektor: Ramil Diniyev
AFFA nümayəndəsi: Erkin Hüseynov
“ASCO Arena”

16:00. “Sumqayıt” –“ Sabah” - 1:2
Qollar: Xəyal Nəcəfov, 31 - Slavik Alxasov, 24, Aleksey İsayev, 65 (penalti)

Hakimlər: İnqilab Məmmədov, Pərvin Talıbov, Rahil Ramazanov, Rauf Allahverdiyev
Hakim-inspektor: Babək Quliyev
AFFA nümayəndəsi: İlham Əliyev
“Kapital Bank Arena”

16:00. “Qarabağ” – “Zirə” - 3:2

Qollar: Mahir Emreli, 58, Kvabena Ovusu, 83, 87 - Ağabala Ramazanov, 2, Lazar Corceviç, 47

Qırmızı vərəqə: Dmitrios Çantakias ("Zirə"), 75, Kevin Medina ("Qarabağ"), 90+2
Hakimlər: Rəhim Həsənov, Namiq Hüseynov, Cəmil Quliyev, Tural Qurbanov
Hakim-inspektor: İmanxan Sultani
AFFA nümayəndəsi: Elgiz Abbasov
“Azersun Arena”

18:00. “Neftçi” – “Keşlə” - 2:1

Qollar: Mirabdulla Abbasov, 65, 80 - Rəhman Hacıyev, 68
Hakimlər: Elçin Məsiyev, Elşad Abdullayev, Kamran Bayramov, Rəşad Əhmədov
Hakim-inspektor: Asim Xudiyev
AFFA nümayəndəsi: Maşallah Əhmədov
“Bakcell Arena”.