Taekvondo üzrə Azərbaycan yığmasının məşqçisi Elnur Amanovun Sportnet.az-a müsahibəsi
- İngiltərənin Mançester şəhərindəki Qran Pridə medalsız qalmağınızı nə ilə əlaqələndirərdiniz?
- 10 - 13 mayda Rusiyanın Kazan şəhərində keçirilmiş Avropa çempionatından sonra heç bir yarışda iştirak etməmişdik. Digər tərəfdən, Qran Priyə 10 gün qalmış Fəridə Əzizovanın əli çatladı, Qaşım Maqomedov əzələsin dartdı. Ayxan Tağızadə isə xidmətdə olduğu bölgələrdən birindəki hərbi hissədən MOİK-ə qayıtdıqdan sonra az məşq etdi. Qran Priyə getməsəydik, bizə cərimə verəcəkdilər. Ona görə də məcburən bu yarışda iştirak etdik.
- Səhv etmirəmsə, daha öncə 3 Qran Pridə iştirak etmədiyinizə görə cərimələnmisiniz...
- Bəli. Avropa çempionatından sonra viza məsələlərinin həll etməyə vaxtımız az olduğu üçün İtaliyanın paytaxtı Romadakı Qran Priyə qatıla bilmədik. Halbuki, iştirakımızı öncədən təsdiqləmişdik. Romaya səbəbsiz yollanmadığımız üçün Rusiyanın paytaxtı Moskvadakı Qran Priyə buraxılmadıq. Çin Taypeyindəki üçüncü Qran Priyə isə uzaqda olduğu üçün getmədik. Bu dəfə isə Mançester Qran Prisinə getməli olduq. Tam hazır olmasaq da, iştirak etdik. Orada çəkiölçmədən keçmək belə idmançıya iki xal verir. 22-23 noyabrda isə Birləşmiş Ərəb Əmirliklərində Qran Prinin finalı olacaq. Bu yarışda da iştirak etmək niyyətindəyik.
- Qran Pridə Patimat Abakarova niyə iştirak edə bilmədi?
- Abakarovanın xarici pasportu İstanbuldakı Atatürk Hava Limanında itdi. Polisə müraciət etməyimizə baxmayaraq, tapa bilmədik. Yəqin ki, Azərbaycanı sevməyən adamın əlinə keçib, o da harasa tullayıb. Nəticədə Abakarova Bakıya qayıtmalı oldu və Mançesterdəki yarışda iştirak edə bilmədi. İstanbul hava limanında dedilər ki, tapılsa, Azərbaycana göndərəcəyik. Lakin hələ də tapılmayıb. Mançesterdən qayıdında da İstanbulda polisdən soruşduq. Bizə dedilər ki, tapılan kimi göndərəcəyik.
- Sizcə, bu, qəsdən törədilmiş hadisədir?
- Xeyr. Sadəcə, İstanbulda yoxlanışdan keçdikdən sonra Mançester reysinə bir neçə saatlıq vaxtımız var idi. Patimat Fəridə ilə birgə çay içməyə, daha sonra isə məscidə getmişdi. Onun olduğu yerləri axtardıq. Polisə müraciət etdik, vaxtımız da var idi. Kim nə edə bilər ki?! Ümid edirəm ki, kimsə pasportu taparaq, aparıb polisə və ya məlumat bürosuna təhvil verəcək.
- Radik İsayevlə Milad Beigi Harçeqani niyə yarışda iştirak etmədilər?
- Radikin çiynində bir az yüngül problem var idi. Həm də övladı dünyaya gəlib, oğlu olub. Final mərhələsində isə iştirak edəcək. İki gündən sonra yenidən məşqlərə başlayırıq. O da komandaya qoşulacaq. Harçeqaninin isə topuğunda zədəsi var idi. Digər tərəfdən, əslən iranlı olduğu üçün qonşu ölkənin qanunlarına əsasən, ora ildə maksimum iki dəfə gedib-qayıda bilər. Bu səbəbdən, yarışa bir müddət qalmış İrana yollandı. Sonra isə bizə bildirdi ki, topuğundakı zədəsinin müalicəsi ilə məşğuldur. Ona görə də Mançesterdəki Qran Priyə çatmadı. Həm Radik, həm də Milad Qran Prinin final mərhələsində iştirak edəcəklər. Finalda hər çəkidə 16 taekvondoçu çıxış edir. Ona görə də ola bilsin, BƏƏ-yə 8 yox, 4 idmançımız iştirak etsin.
- Milli komanda bir müddət əvvəl məşqlərə ara vermişdi. Bu, maliyyə problemləri ilə əlaqədar deyildi?
- Xeyr. Həmin vaxt yarış olmadığından, məşqlər də olmurdu.
- Bəs idmançıların yarışlarda iştirak etməmələri maliyyə problemləri ilə bağlıdır?
- Maliyyə problemləri əvvəllər də var idi. İndi isə bir az qaydasına düşüb, problemlər həllini tapmaqdadır. Hər şey yavaş-yavaş qaydasına düşməkdədir. Bundan sonra yarışlarda iştirakımız davamlı olacaq. Gələn ay Xorvatiyanın paytaxtı Zaqrebə turnirə getməliyik. Qran Pri finalından əvvəl orada idmançıları sınamalıyıq. Dekabrda isə Dünya Kuboku olacaq. Orada komanda şəklində iştirak edəcəyik.
- Deyəsən, yeniyetmə idmançılar da Avropa çempionatına gedə bilmirlər. Təlim-məşq toplanışları da olmur?
- Biz Qran Priyə yollandığımız ərəfədə onların təlim-məşq toplanışı başlamalı idi. Düzü, məlumatım yoxdur. Biz dünən qayıtmışıq. Hazırlıq prosesini görməmişəm. Amma məşqlərə başlamalı idilər.
