AVRO-2016-nın seçmə qrup mərhələsində oktyabrın 13-də Azərbaycan millisi ilə qarşılaşacaq Bolqarıstan yığmasının heyətinə 2 yeni futbolçu cəlb olunub. Sportnet.az-ın məlumatına görə, bunlar "Ludoqorets"də çıxış edən Yordan Minevlə Svetoslav Dyakovdur.
Müdafiəçi Minevlə yarımmüdafiəçi Dyakovu sarı vərəqə limitini doldurduqlarından, oktyabrın 10-da Xorvatiya ilə matçı buraxıblar. Baş məşqçi İvaylo Petev isə futbolçuların məşqlərə ara verməmələri üçün onların "Ludoqorets" düşərgəsində hazırlıq keçmələrini məqsədəuyğun sayıb. Minevlə Dyakov dünəndən milli komandanın məşqlərinə qoşulub.
Qeyd edək ki, oktyabrın 13-də Sofiyada keçiriləcək Bolqarıstan - Azərbaycan oyunu Bakı vaxtı ilə 23:45-də start götürəcək.
