Futbol üzrə Bolqarıstan milli komandasına yeni baş məşqçi təyin olunub. Sportnet.az-ın məlumatına görə, Bolqarıstan Futbol İttifaqının İcraiyyə Komitəsi İvaylo Petevin namizədliyini yekdilliklə dəstəkləyib.
39 yaşlı mütəxəssislə 3 illik müqavilə bağlanılıb. Ona əsas yardımçı kimi Aleksi Jelyazkov, fiziki hazırlıq üzrə məşqçi qismində Roko Perota və qapıçılar üzrə məşqçi Lyubomir Şeytanov kömək edəcək. Petevin qarşısına AVR-2016-nın seçmə mərhələsində H qrupunu ilk "3-lük"də başa vurmaq vəzifəsi qoyulub. Habelə, əsas yığmaya ehtiyat qüvvə məqsədilə B millisinin də yaradılması qərara alınıb.
Qeyd edək ki, Bolqarıstan yığması seçmə mərhələdə Azərbaycanla birgə eyni qrupda yer alıb. Bu komandalar arasında Bakıdakı görüşdə millimiz uduzub - 1:2. Həmin qələbədən sonra Bolqarıstan Xorvatiyaya 0:1, Norveçə 1:2 hesabı ilə uduzub və yalnız Malta ilə heç-heçə edib - 1:1.
