"ShamkirChess 2016" superturinin 4-cü turunun son oyunu Azərbaycan qrossmeysteri Şəhriyar Məmmədyarov və Çin təmsilçisi Hou Yifan arasında sona çatdı. 56-cı gedişədək davam edən görüş heç-heçə nəticələnib. Sportnet.az-ın məlumatına görə, hər iki rəqib gərgin keçən oyun barədə fikirləri ilə bölüşüblər.
Məmmədyarov oytunu debütda bərabərləşdirdiyini bildirib: "Sonrakı hissədə üstünlüyümü artırmaq istədim, lakin buna nail ola bilmədim. Bu gün qələbə qazanmağa israrlı idim, amma oyunun sonunda cüzi problemlərlə rastlaşdım. Dəqiq oyunla bərabərliyi saxlaya bildim. Ümumiyyətlə, mənim həmişə qadınlarla oyunum çətin alınır, amma bu dəfə problem yaşamadım, məyus olmadım və xal bölgüsü ilə ayrıldıq".
Yifan isə Məmmədyarovun çox qüvvətli bir şahmatçı olduğunu söyləyib: "Bu gün də mənim məqsədim möhkəm oynayıb, uduzamamaq idi. Məqsədimə nail oldum. Ona görə riskli gedişləri seçmirdim, vəzir sonluğunda xırda üstünlüyüm var idi, amma rəqib dəqiq oyunla heç-heçə edə bildi. Çox şadam ki, dünya şahmatının güclü simalarının biri sayılan Şəhriyar Məmmədyarov ilə sülh bağladım".
