74 yaşında vəfat etmiş əfsanəvi ABŞ boksçusu Məhəmməd Əli ilə ikigünlük vida mərasimi bu gün onun doğma şəhəri olan Luisvilldə cənazə namazının qılınması ilə başlayacaq. Sportnet.az xəbər verir ki, Məhəmməd Əlinin doğulub boya-başa çatdığı Kentukki ştatındakı Luisvill şəhəri tarixindəki ən mühüm hadisələrdən birinə hazırlaşır.
Pərəstişkarları idmançının doğulduğu və böyüdüyü evi ziyarət etməkdə davam edir. Dəfn mərasimi yerli vaxtla saat 12:00-da başlayacaq. İkinci dəfn mərasimi sabah Məhəmməd Əlinin ABŞ cəmiyyətinin müxtəlif təbəqələrindən olan pərəstişkarlarının iştirakı ilə keçiriləcək. Mərasimdə ABŞ-ın keçmiş prezidenti Bill Klinton, aktyorlar Uill Smit və Billi Kristal, eləcə də jurnalist Brayan Qambelin çıxış edəcəyi gözlənilir. Sonda Məhəmməd Əlinin cənazəsi əvvəlcədən müəyyən olunmuş marşrut üzrə "Cave Hill" qəbirstanlığına aparılaraq, dəfn ediləcək.
Mərasimlər imam Zeyd Şakirin rəhbərliyi altında keçiriləcək.
