İyunun 3-də dünyasını dəyişən əfsanəvi boksçu Məhəmməd Əlinin vida mərasimi keçirilib. Sportnet.az-ın məlumatına görə, mərasimdə Türkiyə prezidenti Rəcəb Tayyip Ərdoğan həyat yoldaşı Əminə Ərdoğanla birgə iştirak edib.
Vida mərasimi Məhəmməd Əlinin anadan olduğu ABŞ-ın Kentuki əyalətinin Lusvill şəhərində keçirilib. Bu, idmançının 1960-cı ildə ilk peşəkar boks matçını qazandığı "Freedom Hall”da olub. Çox insanın qatıldığı mərasim "Qurani Kərim”in oxunması ilə başlanıb, ardından cənazə namazını ABŞ-da müsəlman icmasının liderlərindən İmam Zaid Şakir qılıb.
Məhəmməd Əli bu gün torpağa tapşırılacaq. Mərasimdə ABŞ-ın sabiq prezidenti Bill Klinton çıxış edəcək. Boksçunun cənazəsi Lusvilldəki adını daşıyan küçə boyunca daşınaraq uşaqlığını keçirdiyi məhəlləyə son dəfə gətiriləcək. Məhəmməd Əlinin cənazəsını 2001-ci ildə həyatı ilə bağlı çəkilən "Əli” filimdə obrazını canlandıran Uill Smit, sabiq boks çempionu Lennox Luis daşıyıb. İdmançı Cave Gill qəbiristanlığında dəfn olunacaq.
