Bu gün Azərbaycan Premyer Liqasında XVIII turun daha 2 oyunu keçiriləcək.
Sportnet.az-ın məlumatına görə, günün ilk qarşılaşması Yevlax şəhər stadionunda "Kəpəz" və "Şamaxı" komandaları arasında gerçəkləşəcək.
Ötən tur səfərdə "Qarabağ" üzərində qələbə qazanmış Gəncə təmsilçisindən fərqli olaraq, rəqibi "Qəbələ"yə böyük hesabla uduzub - 0:4. Azər Bağırovun baş məşqçi olduğu kollektiv yenə qələbə qazansa, xalını 15-ə çatdıraraq, yenidən 10-cu pilləyə yüksələcək. Ayxan Abbasovun komandası isə uduzmasa, ən azı bir günlük 7-ci pilləyə qalxacaq.
Bu, iki klubun 40-cı qarşılaşması olacaq. Əvvəlki oyunların 10-da "Kəpəz", 19-da "Şamaxı" qələbə qazanıb və daha 10 matç heç-heçə ilə yekunlaşıb. Topların nisbətində də gəncəlilər xeyli geridədir - 42:63. “Kəpəz” son 4 oyunda qol vurduğu halda, “Şamaxı” axırıncı 6 səfərdən qolsuz dönməyib.
Günün digər görüşü isə "Zirə" və "Sabah" arasında baş tutacaq. Hazırda Rəşad Sadıqovun komandası 29 xalla 5-ci pillədə olduğu halda, Masazır təmsilçisi 40 xalla liderdir. Valdas Dambrauskasın baş məşqçi olduğu kollektiv çətin səfərdən qələbə ilə ayrılmağı bacarsa, 1-ci pillədəki mövqeyini daha da möhkəmləndirə bilər.
Əvvəlki 29 oyunun 8-də "Zirə", 11-də "Sabah" qələbə qazanıb, daha 9 görüş heç-heçə ilə yekunlaşıb. Topların nisbətində də masazırlılar öndədir - 35:29. “Zirə” son 4 matçda qalib gəlməyib. “Sabah” axırıncı 3 səfərin hərəsində 1 qol vurub.
Azərbaycan Premyer Liqası, XVIII tur
31 yanvar (şənbə)
14:30. “Kəpəz” – “Şamaxı”
Hakimlər: Cavid Cəlilov, Kamran Bayramov, Müslüm Əliyev, Kamran Əliyev
VAR: Fərid Hacıyev
AVAR: Asiman Əzizli
Hakim-inspektor: Munis Abdullayev
AFFA nümayəndəsi: İlham Əliyev
Yevlax şəhər stadionu
17:00. “Zirə” – “Sabah”
Hakimlər: Kamal Umudlu, Namiq Hüseynov, Vüsal Məmmədov, Əkbər Əhmədov
VAR: Rəvan Həmzəzadə
AVAR: Rəhman İmami
Hakim-inspektor: Orxan Məmmədov
AFFA nümayəndəsi: Erkin Hüseynov
Zirə İdman Kompleksinin stadionu
Xatırladaq ki, XVIII turun ilk oyun günündə "Sumqayıt" səfərdə "Karvan-Yevlax"ı 2:0, "Qəbələ" evdə "İmişli"ni 3:0 hesabı ilə məğlub edib. Tura fevralın 1-də keçiriləcək "Araz-Naxçıvan" - "Neftçi" və "Qarabağ" - "Turan Tovuz" oyunları ilə yekun vurulacaq.
