İngiltərənin "Mançester Yunayted" klubunun baş məşqçisi Lui Van Qal Premyer Liqada "Mançester Siti" ilə keçiriləcək oyun haqda danışıb. Sportnet.az-ın məlumatına görə, hollandiyalı mütəxəssis şəhərin iki təmsilçisi arasında baş tutacaq görüşü yaşamaq və ölmək uğrunda mübarizə adlandırıb.
O oyun haqda bunları deyib: "Aramızda 4 xal fərq var. Qələbə qazanacağımız təqdirdə, xal fərqi azalacaq. Lakin bizim rəqibimiz tək "Mançester Siti" deyil. "Vest Hem" də turnir cədvəlində bizdən öndə yerləşir. Hələ hədəflərimizdən əl çəkməmişik. Nə etmək lazım olduğunu bilirəm".
Qeyd edək ki, "Mançester Yunayted" - "Mançester Siti" qarşılaşması martın 20-də keçiriləcək. Oyun Bakı vaxtı ilə saat 20:00-da start götürəcək.
