Fransa PSJ-si və İsveç millisinin futbolçusu Zlatan İbrahimoviç Türkiyə ilə yoldaşlıq görüşünü buraxacaq. Sportnet.az-ın məlumatına görə, bu barədə yığmanın baş məşqçisi Erik Hamren açıqlama verib.
O, İbrahimoviçə martın 24-də keçiriləcək qarşılaşmanı buraxma təklifi etdiyini və təcrübəli hücumçunun müsbət cavabladığını söyləyib: "Səbəb odur ki, Zlatanın əla formasını qorumasını istəyirəm. Fikrimcə, bu, hamı üçün ən yaxşı qərardır".
İsveçli mütəxəssis ulduz futbolçunun Türkiyədəki terror aktları ilə əlaqədar oyundan imtina etməsinə dair iddialara isə belə münasibət bildirib: "Mənim işim futbolla bağlı məsələlərdən danışmaqdır. Siyasi və ya təhlükəsizliklə bağlı məsələ yoxdur. Oyunçulardan bu yöndə sual eşitmədim. Bəzi azarkeşlərdən evimizdə qalmağımızın gərəkliyinə dair məktublar aldım".
Qeyd edək ki, Türkiyə - İsveç matçı martın 24-də Antalyada keçiriləcək.
