Çimərlik futbolu üzrə Azərbaycan milli komandası Avropa Superfinalına vəsiqə qazanıb. Sportnet.az-ın AFFA-nın rəsmi saytına istinadən məlumatına görə, Rusiyanın paytaxtı Moskvada keçirilən Avropa çempionatının seçmə mərhələsində millimiz ilk oyunda Qazaxıstan yığmasını 3:1 hesabı ilə məğlub edib.
Qolları Hikmət Bağırov, Amid Nəzərov və Sabir Allahquliyev vurub.
Növbəti oyunda millimiz Estoniya yığmasına məğlub olub. 1:2 hesabı ilə başa çatan qarşılaşmada futbolçularımızdan Hikmət Bağırov fərqlənib.
Qrup mərhələsinin üçüncü oyununda isə millimiz Moldova yığmasını 4:2 hesabı ilə məğlubiyyətə uğradıb. Moldova komandasının qapısından topları Asif Zeynalov, Orxan Məmmədov, Amid Nəzərov və Sabir Allahquliyev keçirib.
Qeyd edək ki, milli komandamızın iştirak edəcəyi Avropa Superfinalı avqustun 14-dən 17-dək İspaniyanın Torredambarra şəhərində təşkil olunacaq.
