2009/2010-cu illər mövsümündə Hollandiya çempionu olmuş "Tvente" klubu Kral Futbol Assosiasiyasının (KNVB) qərarı ilə ikinci diviziona göndərilib. Sportnet.az-ın KNVB-nin rəsmi saytına istinadən məlumatına görə, "Tvente" maliyyə reqlamentini pozduğuna görə cəzalandırılıb.
Bundan əvvəl "Tvente"nin peşəkar statusdan məhrum ediləcəyi bildirilsə də, əvəzində klubun 45,25 min avro cərimə ödəyəcəyi və növbəti mövsümü Hollandiya çempionatının aşağı liqasından başlayacağı barədə qərar qəbul olunub.
Ötən ilin dekabr ayının ortalarında "Tvente" üç mövsümlüyünə Avrokubok oyunlarında çıxış etməkdən kənarlaşdırılmışdı.
Qeyd edək ki, hazırda "Sumqayıt"da çıxış edən Vaqif Cavadov 2009-cu ilin yanvarından iyunadək "Tvente"də yer alıb və Hollandiya çempionu adını qazanıb.
