"Real Madrid”in portuqliyalı futbolçusu Pepe keçmiş baş məşqçisi Joze Mourinyo haqda maraqlı açıqlamalar verib.
Sportnet.az-ın xarici KİV-ə istinadən verdiyi məlumata görə, təcrübəli müdafiəçi həmyerlisi ilə İspaniyada çalışdıqları dönəmin çox pis keçdiyini bildirib.
Pepenin sözlərinə görə, Mourinyo "Real Madrid”in baş məşqçisi olduğu vaxtlarda insanlar onlara nifrət edirdi: "Bunun da tək səbəbi onun özü idi. Allaha çox şükür ki, klubdan çox tez getdi. Sonralar hər şey yoluna düşdü. Hazırda özümü yaxşı formada hiss edirəm”.
Portuqliya millisinin üzvü klubda hazırkı baş məşqçisi Zinəddin Zidanla Mourinyonu da müqayisə edib: "Onların sadəcə, fərqli insanlar olduqlarını deyə bilərəm. Məşqçi kimi hansının daha güclü olduğunu söyləmək düzgün olmaz”.
Xatırladaq ki, Mourinyo 2010-13-cü illərdə "Real Madrid”in baş məşqçisi olub.
