Dünya futbolunun ulduzlarından olan Ronaldinyo Bakıya gəlib. Sportnet.az-ın məlumatına görə, 36 yaşlı braziliyalı dünya çempionu paytaxtımızda olması ilə bağlı "Twitter" sosial şəbəkəsindəki şəxsi səhifəsində bununla məlumat yerləşdirib.
Ronaldinyo "Bakıda ilk gün, şou" sözlərini yazıb. Bununla da onun ölkəmizə yalnız bu gün gəldiyi qənaətinə gəlmək olar. Şəklə əsasən hücumçunun "Four Seasons" otelində olduğunu söyləmək mümkündür.
Ronaldinyonun Azərbaycana futbol klublarımızdan birinin dəvəti ilə gəldiyi və əməkdaşlıqla bağlı müqavilə imzalayacağı bildirilir. Belə ehtimallara heyətində bir neçə braziliyalısı olan "Qarabağ"ın sabah Yunanıstan PAOK-u ilə Avropa Liqasının III tur matçına çıxacağı faktı əsas verib.
Digər tərəfdən, Ronaldinyo oktyabrın 15-də İspaniya "Barselona"sına səfir təyin edilib. Onun səlahiyyətlərinə Kataloniya klubunu rəsmi mərasimlərdə təmsil etməsi də daxildir. Lakin "sambaçı" La Liqanın VIII turunda "Barsa"nın "Deportivo"nu 4:0 hesabı ilə yendiyi görüşü izləməkdənsə çimərlikdə istirahəti üstün tutub.
Qeyd edək ki, hazırda 36 yaşında olan Ronaldinyo Braziliyanın "Flamenqo" və "Qremio", İtaliyanın "Milan", İspaniyanın "Barselona", Fransanın PSJ klublarında çıxış edib. 2002-ci ildə o, Braziliya yığması ilə dünya çempionu, 2006-cı ildə "Barselona"nın heyətində Çempionlar Liqasının qalibi olub. Son illər Ronaldinyonun karyerası elə də uğurlu alınmayıb. 2015-ci ilin martında Meksikanın "Keretaro", həmin ilin iyulunda Braziliyanın "Fluminense" klubu onu heyətdən kənarlaşdırıb. Bu ilin iyulunda isə Ronaldinyo Hindistanın futzal liqasında iştirak edib və 500 min dollar qonorar alıb.
