Bakının "Neftçi" klubu qış təlim-məşq toplanışı çərçivəsində növbəti yoxlama oyununu keçirib. Sportnet.az-ın məlumatına görə, rəqib Özbəkistanın "Nasaf" klubu olub.
"Bellis Deluxe” hotelinin meydançasında baş tutan qarşılaşma Bakı vaxtı ilə saat 18:00-da start götürüb. Rəqib ikinci hissədə vurduğu qolla 1:0 hesabı ilə qalib gəlib. Bununla da "Neftçi" cari ildə ilk məğlubiyyətini ukraynalı sabiq baş məşqçisi Anatoli Demyanenkonun vaxtilə rəhbərlik etdiyi komandadan alıb.
Bu Elxan Abdullayevin rəhbərlik etdiyi komandanın Türkiyənin Antalya şəhərindəki ikinci oyunudur. "Ağ-qaralar" ilk oyunda "Sivasspor"la qolsuz heç-heçə edib.
"Neftçi" - "Nasaf" - 0:1
"Neftçi”: 33. Boban Baykoviç, 27. Məqsəd İsayev, 29. Georgi Navalovski, 6. Pavel Dreksa, 3. Jairo Rodriges, 87. Kirilo Petrov, 8. Zdenek Folprext, 17. Rəhman Hacıyev, 10. Cavid İmamverdiyev (K), 9. Namiq Ələsgərov, 20. Damir Vidoviç.
İkinci hissədə meydana İqnasio Herrera, Fəhmin Muradbəyli, Tərzin Cahangirov, Edson Kastilyo və Maksim Vaylo daxil olublar. Əvəz olunmuş futbolçular Zdenek Folprext, Jairo Rodriges, Cavid İmamverdiyev, Damir Vidoviç və Boban Baykoviçdir.
Oyunun ilk 15 dəqiqəsi komandamızın hücumları şəraitində keçib.
16-cı dəqiqədə rəqib komandanın ilk hücumu təhlükəli alınsa da, Baykoviç gözəl oynayıb.
27-ci dəqiqədə "Neftçi"ni qapıçısı rəqib komandanın yerinə yetirdiyi cərimə zərbəsindən sonra topu "doqquzluq”an çıxardıb.
39-cu dəqiqədə İmamverdiyevin zərbəsindən sonra rəqib qapıçı topu tutub.
42-ci dəqiqədə Cavidin cərimə meydançasına daxil olandan sonra rəqib futbolçu əli ilə topa toxunsa da, hakim penalti zərbəsi təyin etməyib.
İlk hissənin sonunda İsayevin ötürməsindən sonra Vidoviç başla qeyri-dəqiq oynayıb.
46-cı dəqiqədə Cahangirovun zərbəsindən sonra top qapının yanından keçib.
51-ci dəqiqədə Herreranın zərbəsindən sonra rəqib qapıçı topu tutub.
55-ci dəqiqədə rəqib qapıçı ilə təkbətək çıxan Hacıyev fürsəti boşa verib. Qolkiper futbolçumuzun zərbəsindən sonra topu çıxardıb.
64-cü dəqiqədə Ələsgərov rəqib müdafiəçini aldadaraq qapıya zərbə endirsə də, qapıçı topu tutub.
80-ci dəqiqədə Namiqin qüvvətli zərbəsindən sonra rəqib qapıçı qola imkan verməyib.
82-ci dəqiqədə rəqib komanda hesabı açıb – 0:1. Matç bu hesabla başa çatıb.
