Türkiyənin Antalya bölgəsindəki qış təlim-məşq toplanışını bu gün başa vuracaq Bakının "Neftçi" klubu baxışda olan Ramon İdalesio Kardozonu Azərbaycana gətirməyəcək. Sportnet.az-ın klub saytına istinadən məlumatına görə, baş məşqçi Elxan Abdullayev 2 yoxlama oyununda sınadığı paraqvaylı hücumçunun çıxışından razı qalmayıb.
Kardozo Rusiyanın "Tosno" klubu ilə keçirilən görüşdə meydanda olub və bir qol vurub. Matçın 76-cı dəqiqəsində isə Tərzin Cahangirovla əvəzlənib. Həmin oyun 2:2 hesabı ilə yekunlaşıb. O, Rumıniyanın "Konkordiya” klubu ilə 1:1 hesabı ilə başa çatan qarşılaşmada isə fərqlənə bilməyib.
Qeyd edək ki, Kardozo karyerası ərzində Paraqvayın "Takuaru”, "Serro Porteno”, "Nasional”, "Deportivo Kapiata”, Portuqaliyanın "Penafiel”, "Vitoria Setubal”, "Moreirense” və Perunun "Leon Huanuko" klublarının şərəfini qoruyub.
