"Təlim-məşq toplanışını dəyərləndirsək, yeganə kiçik xoşagəlməzlik hazırlığa bir az gec başlamağımız idi. Ardınca isə hər şey qaydasında getdi. Hava şəraiti baxımından da bəxtimiz gətirdi. Sakit tərzdə çalışıb, yaxşı hazırlıq keçməklə toplanışı yekunlaşdırdıq". Sportnet.az-ın məlumatına görə, bu fikirləri "Qəbələ"nin baş məşqçisi Roman Qriqorçuk klubunun rəsmi saytına açıqlamasında bildirib.
Türkiyənin Antalya şəhərində keçirilən təlim-məşq toplanışında son yoxlama oyununu bu gün keçirən "Qəbələ” Makedoniyanın "Şkendiya” klubunu 2:1 hesabı ilə məğlub edib. Matçdan sonra hazırlıq prosesi barədə fikirlərini açıqlayan ukraynalı mütəxəssis zədəli oyunçuların da sıraya döndüklərini diqqətə çatdırıb: "Onların tam hazır olduğunu deyə bilməsəm də, artıq məşqlərə start veriblər. Bir sözlə, toplanış haqda müsbət fikir söyləmək olar. Hazırlığı yaxşı, keyfiyyətli və faydalı hesab edirəm”.
Qriqorçuk toplanış çərçivəsində hər şeyin, xüsusilə də iş prosesinin yüksək səviyyədə təşkilini də vurğulayıb: "İşimizi elə qurmuşuq ki, bizə çalışmaq daha rahatdır. Belə yanaşma nəticəsində hansısa intizamsızlıq, məişət problemi, qeyri-peşəkarlıq və ya səhlənkarlıq üzündən vaxt itirib, əsəblərimizi korlamırıq. Ürəkaçan şəraitdə işləyib, bundan zövq alırıq. Bizdə hər şey rahatdır və peşəkar səviyyədədir. Bu da işin keyfiyyətini artırır və daha effektli olması ilə nəticələnir. Çünki işə mane olan və fikri yayındıran məqamlar olmur”.
Ukraynalı mütəxəssis komandanın hazırkı durumundan da razı qaldığını qeyd edib: "Mövsümün ikinci yarısının ilk oyununa hazırlığın səviyyəsi barədə öncədən nə isə demək olmur. Amma hazırlıq prosesində çox yaxşı işlər görülüb. Oyun planında bir sıra məqamları aradan qaldırmışıq. Birmənalı şəkildə deyərdim ki, oyunun təşkilində yaxşılığa doğru irəliləmişik. Hətta bu istiqamətdə istəyimizə artıqlaması ilə nail olmuşuq. Futbolçular da hər şeyi anlayır. Hər hansı texniki qüsurların olması isə təbii haldır. Onlardan qurtulmaq mümkün deyil. Sadəcə belə xətaların mümkün qədər az olmasını istəyirəm. Lakin taktiki, psixoloji və funksional baxımdan yaxşı hazır olduğumuzu deyərdim”.
