Azərbaycan Premyer Liqasının XV turu çərçivəsində bu günə nəzərdə tutulan oyunların təxirə salınması gözlənilmir.
Bu barədə Sportnet.az-a görüşlərə ev sahibliyi edəcək "Qəbələ" və "İnter" klublarından bildirilib. Əyalət təmsilçisinin rəsmisi Nail Kərimov deyib ki, ötən gündən Qəbələ şəhər stadionuna yağan qar tam təmizlənib. Hazırda elə də qar yağmır və meydanda futbolun oynanmasına maneə yoxdur.
"Bankirlər"in mətbuat katibi Səbuhi Məmmədov isə "İnter Arena"ya ümumiyyətlə "qarın oturmadığını" söyləyib.
Qeyd edək ki, "Qəbələ" saat 15:00-da "Sumqayıt"ı, "İnter" isə saat 17:30-da "Kəpəz"i qəbul edəcək.
