Futbol üzrə Azərbaycan Premyer Liqasında XVI tura yekun vurulub. Sportnet.az-ın məlumatına görə, açılış oyununda autsayder AZAL lider "Qarabağ"ı qəbul edib.
Görüş qonaqların qələbəsi ilə yekunlaşıb - 2:1.
Hərçənd, ilk qolu meydan sahibləri vurub. 7-ci dəqiqədə əks-hücum nəticəsində Rəşad Abdullayev AZAL-ı hesabda irəli çıxarıb. Lakin "təyyarəçilər" ilk yarının uzatma dəqiqələrində azlıqda qalıb. Baş hakim Orxan Məmmədov "Qarabağ"ın qapıçısı İbrahim Şehiçin yıxıldığı epizodda Sadio Tounkaranı günahkar bilərək, ona ikinci sarı vərəqə göstərib və meydandan kənarlaşdırıb.
Qonaqlar say üstünlüyündən ikinci hissədə yararlanmağı bacarıblar. 60-cı dəqiqədə Maksim Medvedev, 63-cü dəqiqədə Coşqun Diniyev fərqlənərək, "Qarabağ"ın qələbəsini təmin edib. Bununla da xallarını 36-ya çatdıran Ağdam komandası liderliyini davam etdirib. AZAL isə 8 xalla 8-ci pillədə qalıb.
"Qarabağ" bu görüşə cəzalı Riçard Almeyda və oyun öncəsi zədələnən kapitan Rəşad Sadıqovun yoxluğunda çıxıb. 23-cü dəqiqədə isə Dani Kintana zədələnərək, meydanı xərəkdə tərk edib.
"Qəbələ" ilə "Neftçi" arasında maraqlı, gərgin mübarizə şəraiitndə keçib. Komandaların səylərinə baxmayaraq, Qəbələdə ilk hissədə hesab açılmayıb. Matçın ikinci hissəsində meydan sahiblərinin baş məşqçisi Roman Qriqorçukun əvəzləməsi nəticəni müəyyənləşdirib. Üç ilə yaxın fasilədən sonra "qırmızı-qaralar"a qayıdan Daniel Subotiç dönüşünü qolla qeyd edib. İsveçrəli hücumçu qarşılaşmanın 77-ci dəqiqəsində yenidən komanda yoldaşı olduğu Ürfan Abbasovun ötürməsini başla tora göndərib. Həmin epizodda qonaqlar oyundankənar vəziyyətə işarə etsə də, qol sayılıb.
Oyunun uzatma dəqiqələrində isə baş hakim Fariz Yusifov Qriqorçuku "Neftçi"dəki köməkçi məşqçi ilə mübahisə etdiyinə görə "texniki zona"dan qovub. Bununla da cəzlaı duruma düşən ukraynalı mütəxəssis növbəti turda fevralın 8-də AZAL-la ev oyununu tribunadan izləməli olacaq. Onu "texniki zona"da köməkçisi Sənan Qurbanov əvəzləyəcək.
Azərbaycan Premyer Liqası, XVI tur
3 fevral (cümə)
15:00 AZAL – "Qarabağ” - 1:2
Qollar: Rəşad Abdullayev, 7. Coşqun Diniyev, 63 - Maksim Medvedev, 60
Qırmızı vərəqə: Sadio Tounkara, 45+3 (AZAL)
Hakimlər: Orxan Məmmədov, Mehman Mahmudov, Vüsal Qənbərov, Ziya Nəsirov
AFFA nümayəndəsi: Eldəniz Musayev
Hakim-inspektor: Asim Xudiyev
"AZAL Arena”
17:00 "Qəbələ” – "Neftçi” - 1:0
Qol: Daniel Subotiç, 77
Hakimlər: Fariz Yusifov, Yaşar Abbasov, Namiq Hüseynov, Elvin Əsgərov
AFFA nümayəndəsi: Məmmədəli Məmmədov
Hakim-inspektor: Əli Hüseynov
Qəbələ şəhər stadionu
| N | Klublar | O | Q | H | M | T-F | X |
| 1 | Qarabağ | 16 | 11 | 3 | 2 | 29-8 | 36 |
| 2 | Qəbələ | 15 | 9 | 5 | 1 | 31-8 | 32 |
| 3 | İnter | 15 | 7 | 7 | 1 | 25-13 | 28 |
| 4 | Sumqayıt | 15 | 4 | 6 | 5 | 14-19 | 18 |
| 5 | Zirə | 15 | 5 | 3 | 7 | 13-16 | 18 |
| 6 | Kəpəz | 15 | 3 | 6 | 6 | 11-17 | 15 |
| 7 | Neftçi | 15 | 3 | 1 | 11 | 10-31 | 10 |
| 8 | AZAL | 16 | 1 | 5 | 10 | 8-30 | 8 |
