"Mənə "Neftçi"dən təklif gələndə NEC-də yaxşı mövsüm keçirmişdim".
Sportnet.az-ın məlumatına görə, bunu Belçikanın "Lommel Yunayted" klubu ilə müqavilə bağlayan "Neftçi"nin sabiq futbolçusu Melvin Platye deyib. 28 yaşlı hücumçu bildirib ki, 2013-cü ilin yayında Azərbaycan təmsilçisini seçməsində "ağ-qaralar"ın həmin vaxt Çempionlar Liqasında çıxışı həlledici rol oynayıb.
O, Azərbaycandakı qısa karyerasını belə dəyərləndirib: "Bu, əla macəra idi. Bakı həqiqətən də gözəl şəhərdir".
Qeyd edək ki, Melvin Platye "Neftçi"də 2013-2014 mövsümünün ilk yarısında forma geyinib. O, flaqmanın Albaniya "Skenderbeu"suna qarşı keçirdiyi Çempionlar Liqasının II təsnifat mərhələsinin hər iki qarşılaşmasında forma geyinib. Lakin Platye həm ev, həm də səfər görüşlərində komandasının qol vurmasına yardım edə bilməyib. Nəticədə "Skenderbeu" əlavə vaxtda vurduğu qolla mərhələ adlayıb. Hollandiyalı hücumçu 14 oyunda cəmi 1 qol vura bildiyi "Neftçi"ni 2014-cü ilin martında tərk edərək, İsveç "Kalmar"ına keçib.
