İspaniyanın Kataloniya əyalətində "Qoqita” ləqəbli "qanuni oğru” Qoça Maisuradze saxlanılıb.
Sportnet.az-ın "Report"a istinadən məlumatına görə, Maisuradze İspaniyada bir neçə evi qarət etməkdə ittiham olunur. Həmin mənzillər arasında futbolçu Jerar Pike və müğənni Şakiranın malikanəsi də var.
İstintaqla müəyyən olunub ki, Maisuradze Barselonada və Aralıq dənizi sahilində varlı şəxslərin ev və mənzillərini qarət edən bir neçə kriminal qruplaşmaya nəzarət edib. Onun oğurlanmış əşyaların yarısını özü üçün tələb etdiyi, əks halda, kriminal qruplaşmanın üzvlərini amansızcasına cəzalandırdığı müəyyən olunub. "Qoqita" həmçinin insanların döyülməsi, oğurlanması və onlara işgəncə verməkdə ittiham olunur.
