Topaz Premyer Liqasının XII turunun "Sumqayıt”la qarşılaşmasında vurulan sonuncu qol "Zirə” üçün yubileylə əlamətdar olub.
Sportnet.az klubun mətbuat xidmətinə istinadən xəbər verir ki, Bilal Həmdinin 90+6-cı dəqiqədə vurduğu top "Qartallar”ın Premyer Liqada 70-ci ev qolu olub. Bunu 52-ci görüşdə reallaşdıran qəsəbə təmsilçisinin öz meydanındakı orta məhsuldarlığı 1,35-ə bərabərdir.
Bilal Həmdi həm də özünün "Zirə”dəki qol hesabını açıb. Matçın sonunda fərqlənən fransalı yarımmüdafiəçi özünün yubiley – 10-cu matçında ilkə imza atıb. Əvvəlki 9 qarşılaşmada qol sevinci yaşamayan legioner bununla da görüşdə son nöqtəni qoyub – 3:1.
Qeyd edək ki, Bilal Həmdi "Zirə”nin tarixində qol vuran 50-ci futbolçu olub. O, bunu Premyer Liqada gerçəkləşdirən 29-cu oyunçudur.
