Azərbaycan Premyer Liqasında VI turun daha bir oyunu keçirilib.
Sportnet.az-ı məlumatına görə, "Qarabağ" "Azersun Arena"da "Qəbələ"ni qəbul edib. Komandalar matça birgə pankartla çıxıblar. Pankart üzərində "Əmrinizdəyik, Cənab Ali Baş Komandan" yazılıb.
Futbolçular isə üzərində şəhid general Polad Həşimov və Gəncə terrorunda xəsarət almış 5 yaşlı Ömərin birgə fotosu və "Bir ölər, min dirilərik" yazılmış maskada olublar. Dövlət himni səsləndirildikdən sonra komandalar birgə foto çəkdiriblər.
Görüş Ağdam klubunun böyük hesablı qələbəsi ilə başa çatıb - 3:0. Hesabı 44-cü dəqiqədə Donald Gerye açıb. 89-cu dəqiqəqə Patrik Andrade penalti ilə fərqi artırıb. 90+1-ci dəqiqədə isə Toral Bayramov yekun nəticəni müəyyənləşdirib.
Beləliklə, 3 oyundan sonra qələbə qazanan "Qarabağ" xallarını 8-ə çatdıraraq, 3-cü pilləyə yüksəlib. "Köhlən atlar"ın ehtiyatda "Səbail"lə təxirə salınmış qarşılaşması da var. 4 xalı olan "Qəbələ" isə sonuncu pillədə yer alıb.
Qeyd edək ki, günün ilk matçında "Səbail" evdə "Keşlə" ilə heç-heçə edib - 1:1. Tura sabah keçiriləcək "Neftçi" - "Sabah" və "Sumqayıt" - "Zirə" görüşləri ilə yekun vurulacaq.
------------------------
Azərbaycan Premyer Liqasında VI tura start verilib.
Sportnet.az-ın məlumatına görə, açılış oyunu "ASCO Arena"da "Səbail" və "Keşlə" komandaları arasında keçirilib.
Komandalar görüşə "Şəhidlər ölməz, Vətən bölünməz" pankartı ilə çıxıblar. Tribunalarda isə Azərbaycan bayrağı və işğaldakı rayonların adları yazılmış lövhələr qoyulub. Matç Azərbaycanın Dövlət Himninin səsləndirilməsi ilə başlayıb.
Baş hakim Səbuhi Bayramovun idarə etdiyi görüş heç-heçə ilə yekunlaşıb - 1:1. Matçın ilk yarısında qapılara qol vurulmayıb. Hesabı 49-cu dəqiqədə qonaq komandadan Rəhman Hacıyev uzaqdan zərbə ilə açıb. Bundan cəmi 2 dəqiqə sonra Bahadur Həziyev cinah ötürməsini baş zərbəsi ilə tamamlayaraq, bərabərliyi təmin edib.
83-cü dəqiqədə "Səbail"in müdafiəçisi Adil Nağıyev ikinci sarı vərəqə ilə meydandan qovulub. Lakin "Keşlə" say üstünlüyündən yararlana bilməyib.
Bu nəticədən sonra xalını 9-a çatdıran "Keşlə" 2-ci pillədə qalıb. 4 xala malik "Səbail" isə 7-ci pilləyə yüksəlib.
Qeyd edək ki, bu gün "Qarabağ" - "Qəbələ", oktyabrın 18-də isə "Neftçi" - "Sabah" və "Sumqayıt" - "Zirə" görüşləri keçiriləcək.
---------------------------------------
Bu gün Azərbaycan Premyer Liqasında VI tura start veriləcək. Sportnet.az-ın məlumatına görə, ilk oyun günündə iki qarşılaşma keçiriləcək.
Turun açılış matçında "Səbail" "Keşlə"ni qəbul edəcək. Rəqibindən bir oyun az keçirən meydan sahibləri 3 xalla sonuncu pillədədir. "Keşlə" 8 xalla 2-3-cü yerləri bölüşdürür. Komandalar indiyədək Premyer Liqada 11 dəfə üz-üzə gəliblər. Bunların 6-da "Səbail", 3-də qonaq komanda qələbə qazanıb. 2 görüş isə heç-heçə yekunlaşıb. Topların fərqində də "Səbail" öndədir - 13:10. Komanda son 3 Premyer Liqa matçında "Keşlə"yə uduzmayıb və iki görüşdə qapısını toxunulmaz saxlaya bilib.
Günün digər matçında son ölkə çempionu "Qarabağ" "Qəbələ"ni qəbul edəcək. Bir oyun az keçirən Ağdam təmsilçisi 5 xalla 6-cı yerdədirsə, "qırmızı-qaralar" 4 xalla 7-ci sırada qərarlaşıb. Bu matç komandaların çempionatda 47-ci dueli olacaq. 23 görüşdə Ağdam klubu, 10 dəfə "Qəbələ" meydanı 3 xalla tərk edib. 13 oyunda heç-heçə qeydə alınıb. Topların fərqində də meydan sahiblərinin aşkar üstünlüyü var - 64:41. “Qarabağ” rəqibinə qarşı son 7 oyunda meydanı qolsuz tərk etməyib. “Qəbələ” isə son 3 səfər maçından xalsız ayrılıb.
Azərbaycan Premyer Liqası
VI tur
14:00. "Səbail" - "Keşlə" - 1:1
Qollar: Bahadur Həziyev, 51 - Rəhman Hacıyev, 49
Qırmızı vərəqə: Adil Nağıyev, 83 ("Səbail")
Hakimlər: Səbuhi Bayramov, Müslüm Əliyev, Nahid Əliyev, Rauf Cabarov
Hakim-inspektor: İmanxan Sultani
Affa nümayəndəsi: Əsgər Əmirəliyev
"ASCO Arena"
16:00. "Qarabağ" - "Qəbələ" - 3:0
Qollar: Donald Gerye, 44, Patrik Andrade, 89 (penalti), Toral Bayramov, 90+1
Hakimlər: Rəşad Əhmədov, Pərvin Talıbov, Cavanşir Yusifov, Elçin Məsiyev
Hakim-inspektor: Ömər Paşayev
Affa nümayəndəsi: Ramiz Mustafayev
"Azersun Arena"
Qeyd edək ki, VI turun "Neftçi" - "Sabah" və "Sumqayıt" - "Zirə" matçları oktyabrın 18-də olacaq.
