"Neftçi" futbol klubu qış təlim-məşq toplanışını ölkə daxilində keçirməyi qərara alıb.
Sportnet.az-ın məlumatına görə, bu barədə komandanın baş məşqçisi Samir Abasov "Neftçi TV"yə açıqlamasında deyib. 42 yaşlı mütəxəssis bildirib ki, hazırlıq prosesi Bakıda olacaq: "Artıq məsələ 80-90 faiz dəqiqləşib. Ölkə xaricinə çıxmaq düzgün olmaz, çünki koronavirus təhlükəsi var. Orada nə isə olsa, vəziyyət daha da gərginləşəcək. Sadəcə, toplanışın vaxtı dəqiqləşməlidir".
Koronavirusdan yenicə sağalmış baş məşqçi vəziyyətinin qənaətbəxş olduğunu söyləyib: "Komandamızda virusa yoluxan hər kəsdə müəyyən simptomlar aşkarlandı. Xəstəlik kimdəsə rahat, kimdəsə çətin keçdi. Axırıncı testdən sonra mənim kimi bir çox şəxsdə nəticə neqativ çıxdı. Amma koronavirusun çətinlikləri var, gizlətməyək. Artıq iş başındayıq. Vəziyyətlə ayaqlaşmaq lazımdır".
Stiven Monroz, Bruno Teluşi və Kamran İbrahimovun aktiv xəstə olduğunu xatırladan Abasov Cabir Əmirlinin zədələndini vurğulayıb: "Həkimdən cavab gözləyirik. Hazırda bütün komandalar əziyyət çəkir. Futbolçular yaxşı vəziyyətdə deyillər. Bu, əvvəlki xəstəlikdən fərqlidir. Bədəni sanki susdurur. Amma ümumi vəziyyət normaldır".
Mütəxəssisin sözlərinə görə, futbolçular 90 dəqiqə eyni tempdə oynaya biləcək durumda deyillər: "Bütün komandalarda balans eynidir. Oyunçular 60-70 dəqiqə dözsələr, böyük işdir".