Azərbaycan millisi 2026-cı il dünya çempionatının seçmə mərhələsində üçüncü oyununa çıxıb.
Sportnet.az-ın məlumatına görə, Ayxan Abbasovun baş məşqçi olduğu kollektiv Fransanın qonağı olub.
Parisdəki "Park de Prens" stadionunda keçirilmiş görüş meydan sahiblərinin böyük hesablı qələbəsi ilə yekunlaşıb - 3:0.
Görüş yerli komandanın böyük üstünlüyü şəraitində keçib. Lakin 5-4-1 taktikası ilə meydana çıxan Azərbaycan millisi rəqibə ciddi müqavimət göstərib. Fransa yığması ilk qolu 45+2-ci dəqiqədə vurub. Kapitan Kilian Mbappe müdafiə xəttini yararaq, topu uzaq küncə göndərib.
69-cu dəqiqədə Mbappe Adrien Rabyonun fərqlənməsinə şərait yaradıb. Son nöqtəni isə uzun müddətdən sonra milliyə dəvət almış Florian Toven 84-cü dəqiqədə qoyub.
Beləliklə, Fransa D qrupunda ardıcıl üçüncü qələbəni qazanıb. Hazırda Didye Deşamın baş məşqçi olduğu kollektiv 9 xalla vahid liderdir. Ukrayna 4 xalla 2-ci, İslandiya 3 xalla 3-cüdür. 1 xala malik Azərbaycan isə 4-cü yerdə gedir.
Oktyabrın 13-də Ukrayna - Azərbaycan, İslandiya - Fransa görüşləri keçiriləcək.
------------------------
Bu gün Azərbaycan millisi 2026-cı il dünya çempionatının seçmə mərhələsində növbəti görüşünü keçirəcək.
Sportnet.az xəbər verir ki, D qrupunda yer alan yığma Fransanın qonağı olacaq.
Parisdəki "Park de Prens" stadionunda oynanılacaq qarşılaşmanı norveçli baş hakim Rohit Saqqi idarə edəcək.
Bu, hər iki komandanın qrupda üçüncü matçı olacaq. İlk 2 görüşdə Fransa səfərdə Ukraynanı 2:0, evdə İslandiyanı 2:1 hesabı ilə yenib. Azərbaycan millisi isə İslandiyaya 0:5 hesablı səfər məğlubiyyətinin ardından evdə Ukrayna ilə heç-heçə edib - 1:1.
Fransa və Azərbaycan milliləri indiyədək 2 dəfə üz-üzə gəlib. Azərbaycan millisi ev oyunlarını Türkiyənin Trabzon şəhərində keçirdiyi vaxt - 13 dekabr 1994-cü ildə Fransa ilə görüşdə 0:2, 1995-ci il sentyabrın 6-da Oser şəhərindəki "Ebbe Deşam" stadionundakı matçda 0:10 hesablı məğlubiyyətə düçar olub. Bu, bir komandanın ən böyük hesablı qələbəsi, digərinin isə ən böyük hesablı məğlubiyyəti kimi tarixə keçib. Darmadağında iştirak etmiş rəqib futbolçulardan Didye Deşam həmin vaxt kapitan olub, hazırda isə baş məşqçidir. Azərbaycan millisi isə Ayxan Abbasovun rəhbərliyi altında ikinci oyununa çıxacaq.
10 oktyabr
DÇ-2026
Seçmə mərhələ
D qrupu
22:45. Fransa - Azərbaycan - 3:0
Baş hakim: Rohit Saqqi
Baş hakimin köməkçiləri: Yorgen Ronninq Valstadsve, Ole Andreas Haukasen
Dördüncü hakim: Daniel Higraff
VAR: Tom Harald Hagen
AVAR: Siqurd Krinqstad
(hamısı Norveç)
Paris, “Park de Prens” stadionu.














































































