Türkiyənin "Qalatasaray" klubu Super Liqanın XXVI turunda "Fənərbağça" ilə evdə keçiriləcək oyuna yeni baş məşqçi ilə çıxacaq. "Report"un məlumatına görə, "sarı-qırmızılar" meydana aşağı yaş qrupları üzrə mütəxəssis Jan Olde Ryekerinkin başçılığı ilə çıxacaq.
Buna səbəb hazırda komandaya rəhbərlik edən Orhan Atikin Türkiyə Futbol Federasiyasının (TFF) nizamnaməsinə əsasən səlahiyyət müddətinin başa çatmasıdır. TFF Pro lisenziyası olmayan çalışdırıcının 15 gün ərzində komandayla meydana çıxmasına icazə verir.
Qeyd edək ki, martın 20-də keçiriləcək "Qalatasaray" - "Fənərbağça" oyunu Bakı vaxtı ilə saat 22:00-da start götürəcək.
