Futbol üzrə 17 yaşadək futbolçular arasında keçirilən Avropa çempionatının final matçından sonra mükafatlandırma mərasimi keçirilib. Sportnet.az-ın məlumatına görə, tədbirə UEFA rəsmiləri ilə yanaşı, başda AFFA-nın prezidenti Rövnəq Abdullayev olmaqla, qurumun rəsmiləri, eləcə də gənclər və idman naziri Azad Rəhimov qatılıb.
Əvvəlcə çempionatın bombardiri Joze Qomeş mükafatlandırılıb. Portuqaliya yığmasının heyətində 7 qol vurmuş hücumçuya xatirə hədiyyəsi verilib. Ardından hakimlər briqadasına mükafat verilib. İspaniya yığmasının gümüş medallar qazanmasından sonra səhnəyə Portuqaliya millisi dəvət edilib. Qızıl medalları alan qaliblərdən kapitan Dieqo Keyruş kubok təqdim edilib.
Qeyd edək ki, final matçının əsas vaxtı 1:1 hesablı heç-heçə ilə yekunlaşıb. Penaltilər seriyasında isə Portuqaliya daha dəqiq olub - 5:4.
