İspaniya Primerosunda yeni komanda çıxış edəcək. Sportnet.az-ın məlumatına görə, bu, Sequndada 2-ci yeri tutan "Leqanes"dir.
42-ci turunda "Mirandes”lə qarşılaşan komanda qazandığı 1:0 qələbə sayəsində Primeroya yüksəlməyi bacarıb. Hesabındakı xalını 74-ə yüksəldən Madrid təmsilçisi 2-ci pillənin sahibi kimi yüksək liqaya çıxmasını rəsmiləşdirib.
Bu, 1928-ci ildə yaradılan "Leqanes”in tarixində ilk belə nəticədir. Tanınmış hücumçusu Samuel Eto'O "Real Madrid"də ilk addımlarını atdığı zamanı heyətə düşə bilmədiyindən 1997/98 mövsümünü icarə əsasında məhz "Leqanes"də keçirib və Sequndada 28 oyunda 3 qol vurub. Son illərdə baş məşqçi kimi "Sevilya"ya Avropa Liqasını qazandıran Unai Emeri isə 2002/03 mövsümündə "Leqanes"də oynayıb.
Qeyd edək ki, Primeroya ilk vəsiqənin sahibi ötən həftə Sequndanın qalibi olan "Alaves”dir. Bu komanda nəinki Primeroda oynayıb, 2001-ci ildə UEFA kubokunun finalçısı olub.
