"Qarabağ" Avropa Liqasında rəqibi olan İtaliyanın "Fiorentina" klubu ispaniyalı legioneri Markos Alonso Mensosa ilə yollarını ayırıb. Sportnet.az-ın məlumatına görə, Florensiya təmsilçisi 27 yaşlı sol cinah müdafiəçisinin karyerasını "Çelsi"də davam etdirəcəyini rəsmən açıqlayıb.
Klub transferin məbləğini açıqlamasa da, İtaliya mətbuatı bunun təxminən 27 milyon avro olduğunu yazıb. Yerli medianın fikrincə, "Fiorentina" əla transfer həyata keçirib. Çünki "Bolton"un keçmiş müdafiəçisi 2013-cü ilin iyununda italyanlara sərbəst futbolçu kimi gəlib və indi onun keçidinə görə böyük maddi qazanc əldə olunub.
Xatırladaq ki, "Qarabağ"la "Fiorentina" arasında ilk oyun sentyabrın 29-da İtaliyada keçiriləcək.
