"Çoxlarına asan görünə bilər. Amma biz səfərdə oynayırdıq. Elə bir komandaya qarşı oynayırdıq ki, sabit və kombinasiyalı oyun sərgiləməsələr də, bütün komanda ilə müdafiədə oturmuşdular".
Bunu Sportnet.az-a açıqlamasında Azərbaycan milli komandasının futbolçusu Əfran İsmayılov DÇ-2018-in seçmə mərhələsində səfərdə San Marinonu 1:0 hesabı ilə yendikləri görüşdən sonra deyib.
O bildirib ki, ən vacib olanı qazandıqları 3 xaldır: "Belə oyunlarda qarşında futbolçu olmasa belə, hətta "fişka"nı da qoysan, yenə çətin keçir. Çünki ilk oyundur, öyrəşmək üçün müddət keçməlidir. Düzdür, 1 qol vurduq, amma əsas odur ki, bu oyunu 3 xalla başa vurduq. Qolların sayı isə 3 də ola bilərdi, 4 də... Qarşıdakı görüşlərə motivasiya olunmaq üçün ilk oyunda səfər qələbəsi çox vacib idi. Bunu da qazandıq"
İsmayılov özünün və komanda yoldaşlarının oyunundan razılıq ifadə edib: "Öz oyunum normaldır, hər şey qaydasındadır. Çalışırıq, işləyirik. Ola bilsin, ilk oyundur, hamı tam açılışmayıb. Getdikcə hamı formaya düşəcək".
