"İnter" Antalyadakı təlim-məşq toplanışında 4 yoxlama oyunu keçirməyi planlaşdırır. Komandanın seleksiyaçı məşqçisi Zaur İsmayılov Sportnet.az-a açıqlamasında ilk sınaq matçı üçün rəqibi axtardıqlarını bildirib.
Onun sözlərinə görə, Albaniya təmsilçisi ilə nəzərdə tutduqlarını qarşılaşma baş tutmayacaq: "Biz ilk oyunu yanvarın 13-15-i aralığında keçirmək fikrindəyik. Həmin vaxta Albaniyanın "Luftetari" klubu ilə matçı danışmışdıq. Ancaq sonradan məlum oldu ki, bu qarşılaşma baş tutmayacaq. Çünki qış fasiləsində 5-ci pillədə çıxan həmin komanda ümumiyyətlə, Antalyaya təlim-məşq toplanışına gələsi olmadı. Belə olan halda, başqa rəqib axtarmalıyıq. Bu haqda təşkilatçılara məlumat vermişik. Bizə təklif olunacaq komandalardan birini seçəcəyik".
Xatırladaq ki, Antalyaya birigün səhər yollanacaq "İnter" yanvarın 18-də "Botoşani" (Rumıniya), 19-da "İstiqlol" (Tacikistan), 21-də "Orenburq"la (Rusiya) qarşılaşacaq.
