"Şahin Diniyevlə mövsümün sonunadək müqaviləmiz var. Hazırda həmin anlaşma davam edir. Məgər ötən il Avropa Liqasında "Kəpəz" tarixində ilk dəfə mərhələ adlayanda Diniyevin boynundan medal asmışdıq ki, pis nəticə olanda da vaxtından tez istefaya göndərək?"
Bunu Sportnet.az-a açıqlamasında "Kəpəz"in Müşahidə Şurasının üzvü Mikayıl Quliyev deyib.
Onun fikrincə, tez-tez baş məşqçi dəyişmək heç bir komandaya xeyir verməz. Bununla yanaşı, Quliyev müəyyən çətinliklərin olduğunu etiraf edib: "Kəpəz"in Bakıda hazırlıq keçməsi üçün lazımi şəraitin yaradılıb. Düzdür, çətinliklər var. Əsas problem stadionla bağlıdır. Gəncə şəhər stadionunun yenidən qurulması üçün şifahi razılıq alınıb. İşə başlayandan sonra bu barədə hamını məlumatlandıracağıq".
Qeyd edək ki, "Kəpəz" Azərbaycan Premyer Liqasında 16 turdan sonra 15 xalla 6-cı pillədə qərarlaşıb. Gəncə təmsilçisi XIII turda "Neftçi"yə 2:0 hesabı ilə qalib gəldikdən sonra xal üzünə həsrətdir.
