"Oyunun ağır olacağını bilirdik. Elə buna görə də matça yaxşı hazırlaşmışdıq. Məncə, matç azarkeşlər və elə jurnalistlər üçün də maraqlı alındı. Son dəqiqələrdə qol buraxdıq, ancaq inam var idi ki, yenə qol vura bilərik. Çünki biz uduzmaq istəmirdik".
Bunu "Zirə"nin futbolçusu Təmkin Xəlilzadə Azərbaycan Premyer Liqasının XVIII turunda "Qəbələ" ilə 2:2 hesablı heç-heçə etdikləri görüşdən sonra Sportnet.az-a açıqlamasında deyib.
Gənc müdafiəçi bütün oyunlara qələbə üçün çıxdıqlarını bildirib: "Ümumiyyətlə, hər oyunda uduzmamağa çalışırıq. Əsasən də öz meydanımızda maksimum xallar uğrunda mübarizə aparırıq. Rəqibin kimliyindən asılı olmayaraq biz meydana üç xal üçün çıxırıq. Bəli, son dəqiqələrdə qapıçımız da irəli atıldı. Futbolda belə bir deyim var ki, uda bilmirsənsə, uduzmamağa çalış. Hesabı bərabərləşdirmək istəyirdik və istəyimizə nail olduq. Heç bir komandaya fərq qoymuruq: "Qəbələ”dir, yoxsa "Qarabağ”dır. Hansı ilə oynayırıqsa, məqsədimiz xal qazanmaqdır”.
Xəlilzadə qarşıdakı turda "İnter”in qonağı olacaq "Zirə”nin bu matça da qələbə istəyi ilə çıxacağını bildirərək, avrokuboklar uğrunda mübarizəni davam etdirəcəklərini sözlərinə əlavə edib: "Bizi "İnter”lə ağır matç gözləyir. Rəqib də çox çətin komandadır. Neçə illərdi ki, eyni sistemdə futbol oynayır. Ümumiyyətlə, çempionatda rəqabət böyüyüb, asan oyun yoxdur. Həmin oyundan da üç xalla ayrılmağı planlaşdırırıq. Avrokuboklara yollanmaq üçün bütün komandalar mübarizə aparır. Hansı komanda güclüdürsə, o da qalib gələcək. Çox qızğın mübarizə gedir, çempionatın belə qızğın olması daha da yaxşıdır”.
"Zirə"nin oyunçusu növbəti turda "Qəbələ" və "Qarabağ” arasında keçiriləcək oyunla bağlı da fikirlərini bölüşüb: "Məncə, bu, əsl derbi olacaq. Heç kimi favorit saymıram. Hər ikisi eynisəviyyəli və bir-birinə qalib gəlməyə qadir komandalardır”.
