Gəncə şəhər stadionunun ot örtüyü "Kəpəz"in "Neftçi" ilə keçirəcəyi Azərbaycan Premyer Liqasının IX tur matçına hazırdır. Sportnet.az-ın Gəncədə olan əməkdaşının məlumatına görə, arenanın qazonu təmir işlərindən sonra normal vəziyyətə gətirilib.
Əvvəlki mövsümlərdə komandalar burada ot örtüyünün bərbad vəziyyətindən şikayətlənirdilər. Amma bu dəfə matçdan 1,5 saat əvvəl meydana ayaq basan "Neftçi" komandasının üzvləri qısa tanışlıqdan sonra razılıq ifadə ediblər.
Artıq stadionun ətrafı və daxilinə xeyli təhlükəsizlik xidməti əməkdaşı cəlb olunub. Azarkeşlər də tribunalara axışmağa başlayıblar.
Qeyd edək ki, bu mövsüm Gəncə şəhər stadionunda ilk oyununu keçirəcək "Kəpəz" "Neftçi" ilə saat 15:00-da üz-üzə gələcək.
