İspaniya "Real Madrid"inin futbolçusu Kriştianu Ronaldu 2017-2018 mövsümünün sonunda klubu tərk etməyi qərara alıb. "Report"un "El Chiringuito" telekanalına istinadən verdiyi məlumata görə, 32 yaşlı hücumçu bu istəyini klub prezidenti Florentino Peresə çatdırıb.
Portuqaliyalı forvard komandadakı durumundan narazıdır. Təcrübəli oyunçunu klub rəhbərliyinin ona münasibəti qane etmir. "Real Madrid" yeni müqavilə təklif etsə də, Ronaldu rədd cavabı verib. O, lazımi səviyyədə qiymətləndirilmədiyini bildirib. Digər tərəfdən, dünyanın ən yaxşı futbolçusu "Real Madrid" rəhbərliyinin fransalı hücumçu Kilian Mbappe və digər dünya səviyyəli oyunçuları almağa cəhdlərini özünə qarşı hörmətsizlik kimi qəbul edib.
Qeyd edək ki, Kriştianu Ronaldu "Real Madrid"lə 2016-cı ilin noyabrında yeni müqavilə bağlayıb. Onun illik əmək haqqı 21 milyon avrodur. Əvəzində "Barselona"nın argentinalı hücumçusu Lionel Messi və Fransa PSJ-sinə keçən braziliyalı fovard Neymar ildə 40 milyon avro qazanır. Ronaldu "Real Madrid"ə 2009-cu ildə İngiltərə "Mançester Yunayted"indən keçib.
