"Qəbələ" klubunun sabiq futbolçusu Endi Hallidey müqavilə üzrə məxsus olduğu Şotlandiya "Reyncers"inə qayıtdıqdan sonra ilk qolunu vurub.
Sportnet.az-ın məlumatına görə, 27 yaşlı yarımmüdafiəçi ABŞ-da keçirilən "Florida Cup" turnirində Braziliya "Korintians"ı ilə görüşdə fərqlənib. Qarşılaşmanın birinci hissəsini 0:2 hesablı məğlubiyyətlə başa vurmasına rəğmən, "Reyncers" fasilədən sonra 4 qol vurub. Qollardan birinə ikinci hissə başlayan kimi meydana daxil olan Hallidey imza atıb. Şotlandiya klubu "Florida Cup"dakı ilk oyununda Braziliyanın digər təmsilçisi "Atletiko Mineyro"nu yenib - 1:0.
Qeyd edək ki, Endi Hallidey cari mövsümün əvvəllərində "Qəbələ"yə 1 illik icarəyə verilsə də, qış fasiləsində komandanı tərk edib. Buna Hallideyin əsas heyətə düşə bilməməsi səbəb olub.
