Futbol üzrə Çempionlar Liqasında I təsnifat mərhələsinə yekun vurulub.
Sportnet.az-ın məlumatına görə, ikinci oyun günündə son 6 cavab qarşılaşması oynanılıb. "Qarabağ" Sloveniya "Olimpiya"sını üstələyərək, Albaniya çempionu "Kukesi"yə rəqib olub. "Olimpiya" isə Avropa Liqasının II təsnifat mərhələsində Şimali İrlandiya "Kruzaders"i ilə qarşılaşacaq.
Qazaxıstan "Astana"sı Monteneqroda "Sutyeska"nın qonağı olub. Görüş Roman Qriqorçukun baş məşqçi olduğu kollektivin 2:0 hesablı qələbəsi ilə yekunlaşıb. Azərbaycan millisinin futbolçusu Riçard Almeyda "Astana"nın heyətində ilk görüşünü keçirib. O, 81-ci dəqiqədə meydana daxil olub.
Eyni zamanda, Slovakiyanın "Spartak", Moldovanın "Şerif", Norveçin "Rusenborq" və Şotlandiyanın "Seltik" komandaları Çempionlar Liqasında mərhələ adlayıb.
Çempionlar Liqası, I təsnifat mərhələsi
Cavab görüşləri
18 iyul
21:00. "Zrinski" (Bosniya və Herseqovina) - "Spartak" (Trnava, Slovakiya) - 1:1
Qollar: Oqnyon Todoroviç, 58 - Boris Qodal, 15
İlk oyun - 0:1
21:00. "Qarabağ" (AZƏRBAYCAN) - "Olimpiya" (Lyublyana, Sloveniya) - 0:0
İlk oyun - 1:0
21:00. "Şerif" (Moldova) - "Torpedo" (Kutaisi, Gürcüstan) - 3:0
Qollar: Ziquy Badibanqa, 9. Jo Santos, 40; 55
İlk oyun - 1:2
21:45. "Rusenborq" (Norveç) - "Valür" (İslandiya) - 3:1
Qollar: Niklas Bendtner, 55; 90+4 (hər ikisi penalti ilə). Anders Trondsen, 72 - Kristinn Freyr Siqurdsson, 85 (penalti ilə)
İlk oyun - 0:1
22:00. "Sutyeska" (Monteneqro) - "Astana" (Qazaxıstan) - 0:2
Qollar: Corce Despotoviç, 38. Serikjan Mujikov, 65
İlk oyun - 0:1
"22:45. "Seltik" (Şotlandiya) - "Alaşkert" (Ermənistan) - 3:0
Qollar: Mussa Dembele, 8; 19 (penalti ilə). Ceyms Forrest, 35
İlk oyun - 3:0
Qeyd edək ki, ilk oyun günündə 10 görüş keçirilib. "Kukesi", HİK, "Hapoel", "Malmö", "Suduva", "Şkendiya", "Videoton", "Srvena Zvezda", "Legiya" və "Ludoqorets" Çempionlar Liqasında mərhələ adlayıb. Onlara uduzan komandalar isə yollarına Avropa Liqasında davam edəcəklər.
