ABŞ-ın "Los-Anceles Qelaksi" komandasının futbolçusu Zlatan İbrahimoviç karyerasında 500-cü qolu vurub.
Sportnet.az-ın məlumatına görə, isveçli hücumçu MLS-də "Toronto" ilə səfər matçının 36-cı dəqiqəsində inanılmaz zərbə ilə fərqlənib. Görüş isə meydan sahiblərinin 5:3 hesablı qələbəsi ilə yekunlaşıb.
Qeyd edək ki, indiyədək karyerasını davam etdirən futbolçulardan yalnız Kriştianu Ronaldu və Lionel Messi 500 qol həddini keçib. İbrahimoviç bu mövsüm MLS-də 22 oyuna çıxıb və 17 qol vurub. O, daha əvvəl İngiltərənin "Mançester Yunayted", İtaliyanın "Yuventus", "İnter" və "Milan", İspaniyanın "Barselona", Fransanın PSJ, İsveçin "Malmö", Hollandiyanın "Ayaks" klublarında çıxış edib. Təcrübəli forvard 2001 - 2016-cı illərdə İsveç yığmasına dəvət alıb.
