"Neftçi” Topaz Premyer Liqasının VIII turunda "Qəbələ” ilə keçirəcəyi oyuna hazırlıq çərçivəsində ikitərəfli oyuna çıxıb.
Sportnet.az xəbər verir ki, "Türk Hava Yolları Futbol Mərkəzi”ndə baş tutan görüşdə Ruslan Abışov, həmçinin Azərbaycan və Haiti milli, U-21 yığma komandalarının düşərgəsində olan futbolçular iştirak etməyiblər. Əvəzində, "Neftçi-2”nin bir neçə üzvü meydanda olub.
"Ağlar” və "qaralar”a bölünən komandaların oyununda birincilər qələbə qazanıblar – 3:2. Qaliblərin qollarını Mirabdulla Abbasov, Şöhrət Yusifov və Tural Axundov vurublar. "Qaralar”dan isə Rəşad Eyubov və Kvame Karikari fərqlənib.
Qeyd edək ki, Neftçi" "Qəbələ" ilə oyununu oktyabrın 20-də səfərdə keçirəcək.
