"Neftçi"nin futbolçusu Kvame Karikarinin Albaniya "Partizani"sinə keçidinin ləngimə səbəbi müəyyənləşib.
Sportnet.az-ın məlumatına görə, bu barədə yerli "Panorama Sport" nəşri qanalı hücumçuya yaxın mənbəyə əsasən xəbər yayıb. Bildirilir ki, flaqman 27 yaşlı forvardı azad agent qismində buraxmaq niyyətində deyil. "Neftçi" Karikarini icarəyə vermək istəsə də, "Partizani" buna razı deyil. Albaniya təmsilçisi futbolçunu azad agent kimi almaqda israrlıdır. Yalnız bu halda transferin baş tutacağı vurğulanır.
Qeyd edək ki, Kvame Karikari "Neftçi" ilə 2018-ci il iyunun 30-da 2 illik müqavilə bağlayıb. Onun aylıq əmək haqqının 13 min dollar olduğu bildirilir. "Partizani" isə Karikariyə ayda 8 min dollar ödəməyə hazırdır.
