"İki bərabər səviyyəli rəqibin ifasında maraqlı oyun alındı. Yaxşı futbol ab-havası var idi. Qolu onlar yox, biz vurduq. Hələ qarşıda ikinci qarşılaşma var. Şanslar bərabərdir".
Sportnet.az-ın Tulaya ezam olunmuş əməkdaşının verdiyi məlumata görə, bu fikirləri "Neftçi"nin futbolçusu Kirill Petrov Rusiyada "Arsenal"ı 1:0 hesabı ilə məğlub etdikləri Avropa Liqasının II təsnifat mərhələsinin ilk oyunundan sonra deyib.
30 yaşlı müdafiəçi bildirib ki, görüş ərəfəsində "topçular"ı yaxşı analiz ediblər. Amma o, oyunadək heç bir komandanı favorit saymadıqlarını vurğulayıb: "Matç başlayanadək hesab 0:0 olur. Ona görə də iki bərabər səviyyəli komandanın qarşılaşdığını demək olar. Favoriti oyundan sonra açıqlamaq mümkündür. Qol vurduğumuz kimi buraxa da bilərdik".
Səfərdə baxımlı oyun sərgilədiklərini deyən Petrov Bakıdakı cavab görüşündə nəticəni daha çox düşünmələrinin gərəkliyini vurğulayıb: "Fikrimcə, Tuladakı oyun azarkeşlərin xoşuna gəldi. Çoxlu mübarizə və maraqlı anlar izlədik. Layiqli qələbə qazandığımızı düşünürəm. Bakıda daha yaxşı çıxış etməliyik ki, müsbət nəticəyə nail olaq. Doğma azarkeşlər önündə gözəl və məhsuldar oyun göstərməliyik. Məncə, ilk növbədə, nəticəni düşünməliyik". Təcrübəli oyunçu onu da qeyd edib ki, Avropa Liqasında artıq 3 matçdır qol buraxmadıqlarına görə müdafiəçilərə yox, komandaya afərin düşür.
"Neftçi" I təsnifat mərhələsində Moldova "Sperantsa"sını məğlubiyyətə uğradıb - 3:0, 6:0.
