Avro-2016-nın seçmə mərhələsinin F qrupunda Farer Adalarını qəbul edən Yunanıstan millisinin öz meydanında 0:1 hesablı məğlubiyyəti ölkəni ayağa qaldırıb. Sportnet.az-ın məlumatına görə, italyan baş məşqçi Klaudio Ranyerinin istefasını istəyən Yunanıstan mediası dünən gecəni "utanc gecəsi" elan edib.
Yunanıstanın məhşur idman qəzetlərindən olan Goal News "Bizi məhv etdin!" başlığı altında xəbər yayımlayaraq Ranyerinin tez bir zamanda ölkəni tərk etməsini istəyib. Yunan oyunçuların da günahkar olduğunu iddia edən qəzet futbolçulara "Təəssüflər olsun sizə!" və "Farer Adalarını məğlub etmək üçün məşqçi lazım deyildi" başlıqları ilə etirazlarını bildirib.
Ölkə mətbuatı tərəfindən istefası istənilən italyan baş məşqçi Klaudio Ranyeri isə millidən ayrılmağı düşünmədiyini deyib: "Bu tip nəticələrdən sonra baş məşqçinin məsuliyyəti boynuna götürməsi lazımdır. Mən komandanı buraxmağı düşünmürəm. Mənim planım burada qalıb komandanı təkrar ayağa qaldırmaq və necə müvəffəqiyyət qazanmaq sualına cavab tapmaqdır".
