UEFA Çempionlar Liqasında 1/8 final mərhələsinə yekun vurulub.
Sportnet.az-ın məlumatına görə, gecənin son cavab görüşlərində "Bavariya" Almaniyada İngiltərənin "Çelsi", "Barselona" isə İspaniyada İtaliyanın "Napoli" komandasını qəbul edib. Hər iki qarşılaşma meydan sahiblərinin qələbəsi ilə yekunlaşıb.
"Bavariya" ilk matçda 3:0 hesabı ilə yendiyi "Çelsi"ni yenə böyük hesabla məğlub edib - 4:1. Qalib komandadan hesabı 10-cu dəqiqədə penaltidən Robert Levandovski açıb. 24-cü dəqiqədə İvan Perişiç ikinci qolu vurub. "Zadəganlar"dan Temi Abraham 44-cü dəqiqədə fərqi azaltsa da, 76-cı dəqiqədə Korenten Tolisso yenidən fərqi 2 topa çatdırıb. 84-cü dəqiqədə isə Levandovski dubl edərək, yekun nəticəni müəyyənləşdirib.
İlk matçda səfərdə "Napoli" ilə 1:1 hesablı heç-heçəyə razılaşmış "Barselona" isə "Nou Kamp"da inamlı qələbəyə imza atıb - 3:1. İlk qolu 10-cu dəqiqədə Kataloniya komandasından Kleman Lanqle vurub. 23-cü dəqiqədə Lionel Messi, 45+1-ci dəqiqədə Luis Suares fərqi artırıb. İtaliya təmsilçisi 45+1-ci dəqiqədə Lorentso İnsinyenin dəqiq penalti zərbəsi ilə təsəlli tapıb.
Beləliklə, 1/4 finalda qarşılaşacaqlar:
12 avqust: "Atalanta" (İtaliya) - PSJ (Fransa)
13 avqust: "Leyptsiq" (Almaniya) - "Atletiko" (İspaniya)
14 avqust: "Barselona" (İspaniya) - "Bavariya" (Almaniya)
15 avqust: "Mançester Siti" (İngiltərə) - "Lion" (Fransa)
Oyunlar "8-lər finalı" formatında Portuqaliyada keçiriləcək.
-------------------------
Bu gün UEFA Çempionlar Liqasında 1/8 final mərhələsinə yekun vurulacaq.
Sportnet.az-ın məlumatına görə, son cavab görüşlərinin ardından 1/4 finala axırıncı 2 vəsiqənin sahibi müəyyənləşəcək.
Qarşılaşmalardan biri İspaniyada baş tutacaq. İlk matçda səfərdə İtaliya "Napoli"si ilə 1:1 hesablı heç-heçəyə razılaşan "Barselona" bu dəfə rəqibini doğma "Nou Kamp"da qəbul edəcək. Kataloniyalıları bu matçda qolsuz bərabərlik də qane edir.
Gecənin digər matçı isə Almaniyada keçiriləcək. Londondakı qarşılaşmada "Çelsi"ni 3:0 hesabı ilə məğlub edən "Bavariya" növbəti mərhələnin 1 addımlığındadır.
Çempionlar Liqası
1/8 final mərhələsi, cavab oyunları
8 avqust
23:00. "Barselona" (İspaniya) - "Napoli" (İtaliya) - 3:1
Qollar: Kleman Lanqle, 10. Lionel Messi, 23. Luis Suares, 45+1 - Lorentso İnsinye, 45+5 (pen.)
İlk oyun - 1:1
23:00. "Bavariya" (Almaniya) - "Çelsi" (İngiltərə) - 4:1
Qollar: Robert Levandovski, 10 (pen.); 84. İvan Perişiç, 24. Korenten Tolisso, 76 - Temmi Abraham, 44
İlk oyun - 3:0
Qeyd edək ki, bu mərhələnin digər 2 oyunu avqustun 7-də baş tutub. "Mançester Siti" İspaniyada olduğu kimi, İngiltərədə də "Real Madrid"i 2:1 hesabı ilə məğlub edərək mərhələ adlayıb. "Yuventus" isə İtaliyada Fransa "Lion"unu eyni hesabla yensə də, ilk matçda rəqibinin 1:0 hesablı ev qələbəsi səbəbindən mübarizəni dayandırıb. "Leyptsiq" (Almaniya), PSJ (Fransa), "Atletiko" (İspaniya) və "Atalanta" (İtaliya) 1/4 finala daha əvvəl vəsiqə qazanıblar.
Çempionlar Liqasının qarşılaşmaları növbəti mərhələdən "8-lər finalı" formatında Portuqaliyanın paytaxtı Lissabonda oynanılacaq.
