Futzal üzrə Azərbaycan millisi Avropa çempionatının seçmə mərhələsində ilk oyununu keçirib.
Sportnet.az-ın məlumatına görə, 3-cü qrupda yer alan Joze Alesio Da Silvanın başçılıq etdiyi kollektiv Slovakiya yığmasını qəbul edib.
Bakı İdman Sarayında oynanılan qarşılaşma Azərbaycanın 4:1 hesablı qələbəsi ilə başa çatıb.
Görüşdə ilk qol 5-ci dəqiqədə vurulub. Meydan sahiblərinin heyətində Tyaqo Bolinya fərqlənib. 15-ci dəqiqədə qonaqlar hesabı bərabərləşdiriblər. Vassura avtoqol müəllifi olub. 34-cü dəqiqədə slovakiyalıların heyətində Anton Brunovski 2-ci sarı vərəqəni alaraq meydandan qovulub. 38-ci dəqiqədə Everton Kardoso yığmanı önə keçirib. 40-cı dəqiqədə Xətai Bağırov 3-cü qolu rəqibin qapısından keçirib. Görüşdə son nöqtəni isə İsa Atayev qoyub.
Qeyd edək ki, Azərbaycan millisi bu qələbə ilə qrupda ilk pilləyə yüksəlib. İkinci sırada eyni xala malik Moldova seçməsi qərarlaşıb. Yunanıstan 3-cü, Slovakiya isə sonuncudur.
----------------------------------------------------
Bu gün futzal üzrə Azərbaycan millisi Avropa çempionatının seçmə mərhələsində ilk oyununu keçirəcək.
Sportnet.az-ın məlumatına görə, 3-cü qrupda yer alan Joze Alesio Da Silvanın başçılıq etdiyi kollektiv Slovakiya yığmasını qəbul edəcək. Bakı İdman Sarayında oynanılacaq qarşılaşma saat 18:00-da start götürəcək.
Milli komanda matça ciddi itki ilə çıxacaq. Fineo De Araujo zədə səbəbindən görüşü buraxacaq. Rəqibin heyətində isə Pyotr Kozar, Qabriel Rik və Patrik Zatoviç koronavirusa yoluxduqları üçün Bakıya gətirilməyib.
Qrupun ilk matçında isə Moldova yığması Yunanıstana qalib gəlib - 3:1.
Avropa çempionatı
Seçmə mərhələ, 3-cü qrup
18:00. Azərbaycan - Slovakiya - 4:1
Qollar: Tyaqo Bolinya, 5, Everton Kardoso, 38, Xətai Bağırov, 40, İsa Atayev, 40 - Vassura, 15 (avtoqol)
Qırmızı vərəqə: Anton Brunovski, 34
Hakimlər: İrina Velikanova, Yuri Neverov (Rusiya), Hikmət Qafarlı, Knyaz Əmiraslanov
Bakı İdman Sarayı
Xal durumu: Azərbaycan - 3, Moldova - 3, Yunanıstan - 0, Slovakiya - 0.
Qeyd edək ki, yığma qrupdakı ikinci sınağında fevralın 2-də Yunanıstanın qonağı olacaq.
