"Qarabağ" UEFA Konfrans Liqasının pley-off mərhələsində cavab oyununa çıxıb.
Sportnet.az-ın məlumatına görə, Qurban Qurbanovun baş məşqçi olduğu komanda Şotlandiyada "Aberdin"in qonağı olub.
Bakıdakı ilk görüşdə 1:0 hesablı qələbə qazanan Ağdam təmsilçisi səfərdə rəqibini 3:1 hesabı ilə üstələyib və qrup mərhələsinə vəsiqə qazanıb.
Qarşılaşma "köhlən atlar"ın üstünlüyü şəraitində keçib. 8-ci dəqiqədə Toral Bayramov cərimə meydançasında qüvvətli zərbə ilə hesabı açıb. Bundan 10 dəqiqə sonra komandanın yeni transferi Kadi Borges şotlandiyalıları növbəti dəfə mərkəzə dəvət edib.
İlk hissə bu hesabla yekunlaşıb. İkinci yarıda da Azərbaycan təmsiçisi matça nəzarəti əlində saxlayıb. Meydan sahiblərinin hücumları isə nəticəsiz qalıb. Əvəzində 72-ci dəqiqədə Abdullah Zubir fərqi 3 topa çatdırıb. 90+2-ci dəqiqədə Luis Ferqyusson penaltidən fərqlənərək təsəlli qoluna imza atıb.
Beləliklə, "Qarabağ" ardıcıl 8-ci mövsüm avrokubokların qrup mərhələsində iştirak hüququna yiyələnib. Ağdam komandası Avropa Liqasının qrup mərhələsində 6, Çempionlar Liqasının qrupunda isə bir dəfə mübarizə aparıb.
Qeyd edək ki, Konfrans Liqasının püşkatma mərasimi bu gün Bakı vaxtı ilə 15:30-da başlayacaq.
-------------------------------------------------------
“Neftçi” UEFA Konfrans Liqasının pley-off mərhələsində cavab oyununu keçirib.
Sportnet.az-ın məlumatına görə, “ağ-qaralar” İsraildə Hayfa “Makkabi”si ilə üz-üzə gəlib. Bakıdakı ilk matçda 3:3 hesablı heç-heçə edən flaqman səfərdə rəqibinə böyük hesabla uduzub – 0:4.
“Ağ-qaralar” görüşə ciddi itkilərlə çıxıblar. Komandanın heyətində Yusuf Laval, Mamadu Mboc və İsmayıl Zülfüqarlı cəzalı olduqları üçün oynamayıblar. “Sammi Ofer” stadionunda təqribən 20 min azarkeşin izlədiyi görüş meydan sahiblərinin kəsərli hücumları ilə başlayıb. Artıq ilk dəqiqədə Hayfa təmsilçisi qol vurmağa yaxın olsa da, “Neftçi”nin qapıçısı Aqil Məmmədov gözəl seyvlə rəqibin sevinməsinə imkan verməyib. Bakı klubu “Makkabi”nin qapısı qarşısında ilk təhlükəli vəziyyəti 14-cü dəqiqədə yaradıb. Yaxşı təşkil olunmuş hücumun yekununda Emin Mahmudovun ötürməsinə Sabir Buqrin çata bilməyib. Cəmi 1 dəqiqə sonra “ağ-qaralar”ın qolkiperi növbəti dəfə komandasını real qoldan xilas edib. Lakin 20-ci dəqiqədə hesabın açılmasına Məmmədov da mane ola bilməyib. San Manaçem görüşdəki ilk qolun müəllifi olub. İlk hissənin əsas vaxtına əlavə olunmuş 2-ci dəqiqədə “Neftçi” növbəti topu buraxıb. Meydan sahiblərinin heyətində Ömər Atzili fərqlənib. “Neftçi” fasiləyə 0:2 hesablı məğlubiyyətlə yollanıb.
İkinci hissədə də təzyiqi davam etdirən Hayfa klubu 52-ci dəqiqədə penalti vurmaq hüququ qazanıb. Aqil Məmmədov Dolev Hazizanın vurduğu topu tutsa da, referi penalti zərbəsinin təkrarlanmasını istəyib. Haziza bu dəfə hədəfdən yayınmayıb – 3:0. Az sonra “Neftçi”nin baş məşqçisi Samir Abasovla yerli azarkeşlər arasında insident baş verib. Bu səbəbdən baş hakim 43 yaşlı mütəxəssisə sarı vərəqə göstərib. "Ağ-qaralar"ın ehtiyat oyunçular skamyasında əyləşənlər isə azarkeşlərlə bağlı UEFA nümayəndəsinə şikayət ediblər. “Makkabi”nin təhlükəli hücumlarını dəf etməkdə çətinlik çəkən “Neftçi” 69-cu dəqiqədə 4-cü topu qapısında görüb. Məhəmməd Abu Fani baxımlı qolla qonaqları məyus edib. Flaqman oyun ərzindəki ən real qol vəziyyətini 87-ci dəqiqədə yaxalayıb. Amma Sezar Meza Kolli üzbəüz epizodda topu qapıdan keçirə bilməyib. Beləliklə, səfərdə 0:4 hesabı ilə uduzan “Neftçi” avrokuboklarla vidalaşıb.
-------------------------------
Azərbaycanı UEFA Konfrans Liqasında təmsil edən "Neftçi" və "Qarabağ" klubları bu gün pley-off mərhələsində cavab oyunlarını keçirəcəklər.
Sportnet.az-ın məlumatına görə, "ağ-qaralar" İsraildə Hayfa "Makkabi"sinin, "köhlən atlar" isə Şotlandiyada "Aberdin"in qonağı olacaq.
Bakıdakı ilk qarşılaşmada rəqibi ilə 3:3 hesablı heç-heçə edən flaqman səfərdə qələbə qazanıb, qrupa düşməyə çalışacaq. "Sammi Ofer" stadionunda oynanılacaq görüş Bakı vaxtı ilə saat 21:00-da başlayacaq. Matçı Şimali Makedoniyadan olan FIFA referisi Aleksandr Stavrev idarə edəcək. "Neftçi"nin heyətində Mamadu Mboc, Yusuf Laval və İsmayıl Zülfüqarlı cəzalı olduqları üçün meydana çıxmayacaq.
"Qarabağ" isə Bakıda 1:0 hesabı ilə qalib gəldiyi "Aberdin"ə səfərdə ən azı uduzmamaq niyyətindədir. "Pittodri" stadionunda keçiriləcək və Bakı vaxtı ilə saat 22:45-də start götürəcək oyunun baş hakimi avstriyalı Harald Lexner olacaq. Ağdam klubunda müdafiəçilər Bədavi Hüseynov, Rahil Məmmədov və Elvin Cəfərquliyev zədə səbəbindən oynamayacaqlar.
UEFA Konfrans Liqası
Pley-off mərhələsi, cavab oyunları
21:00. "Makkabi" (Hayfa, İsrail) - "Neftçi" - 4:0
Qollar: San Menaçem, 20. Ömər Atzili, 45+2. Dolev Haziza, 52 (pen.). Məhəmməd Abu Fani, 69
Hakimlər: Aleksandr Stavrev, Deyan Kostadinov, Qoçe Peterski, Deyan Yakimovski (Şimali Makedoniya)
Hayfa, "Sammi Ofer" stadionu
İlk oyun - 3:3.
22:45. "Aberdin" (Şotlandiya) - "Qarabağ" - 1:3
Qollar: Luis Ferqyuson, 90+2 - Toral Bayramov, 8. Kadi Borges, 18. Abdullah Zubir, 72
Hakimlər: Harald Lexner, Andreas Haydenrayx, Maksimilian Kolbiç, Yulian Vaynberger (Avstriya)
Aberdin, "Pittodri" stadionu
İlk oyun - 0:1
