Almaniyanın "Bavariya" klubunun futbolçusu Frank Riberi İngiltərə "Mançester Yunayted"inin baş məşqçisi Lui Van Qal haqda maraqlı açıqlama verib. Sportnet.az-ın məlumatına görə, fransalı bir neçə il bundan öncə İspaniya "Real Madrid"inə transferinin baş tutmamasında Van Qalı günahlandırıb.
32 yaşlı yarımmüdafiəçi 2009-cu ildə Madrid klubuna keçidi ilə bağlı danışarkən hollandiyalı mütəxəssisi pis adam adlandırıb: "Real Madrid"ə transferimlə bağlı "Bavariya" rəhbərliyi ilə intensiv danışıqlar aparırdım. Van Qal mənə dedi ki, komandanı tərk etməməliyəm. Baş məşqçi Lionel Messinin "Barselona"ya lazım olduğu kimi, mənim də ona lazım olduğumu söylədi. Bilmirəm mənə görə madridlilər nə qədər pul yəklif etdi, amma məni almaq istəyirdilər. Belə olan halda Madrid mövzusu bağlandı. Qalla problemlərim olub. Onu oyunçunun adı, statusu maraqlandırmırdı. Gözündə inamını itirirsən. Yaxşı nəticə versə də, pis insandır. Münasibətlərimiz gərginləşdikdən sonra məni klubumu dəyişməyə razı salmağa çalışırdı və mən də bu barədə düşündüm. Ancaq indi də "Bavariya"dayam".
Qeyd edək ki, Lui Van Qal 2009-2011-ci illərdə "Bavariya"nın baş məşqçisi olub.
