"Qəbələ" klubu futbolçu Cavid Hüseynovun adının Avropa Liqasının pley-off mərhələsində keçiriləcək Yunanıstan "Panatinaikos"u ilə görüşün iştirak ərizəsinə daxil edilməsi ilə bağlı açıqlama yayıb. Sportnet.az-ın məlumatına görə, klub açıqlamada məsələyə aydınlıq gətirib.
Açıqlamada deyilir: "Qəbələ" İdman Klubunun UEFA Avropa Liqasının play-off mərhələsi üçün təqdim etdiyi iştirak ərizəsində Cavid Hüseynovun adının olması ilə bağlı yaranmış anlaşılmazlığa aydınlıq gətirmək məqsədilə bildirmək istəyirik ki, iştirak ərizəsi UEFA-ya turnirin əsasnaməsinə uyğun olaraq avqustun 10-da, yəni Hüseynovla bağlı həbs qətimkan tədbiri seçilmədən öncə göndərilmişdir".
Qeyd edək ki, Cavid Hüseynov haqqında jurnalist Rasim Əliyevin döyülməsi və sonradan xəstəxanada dünyasını dəyişməsi ilə bağlı aparılan araşdırmalar nəticəsində 3 ay həbs qətimkan tədbiri seçilib.
