Futbol fəaliyyətindən 8 il müddətinə kənarlaşdırılan FİFA-nın sabiq prezidenti Yozef Blatter Fransa Kuboku matçı zamanı radioda çalışacaq. Sportnet.az-ın məlumatına görə, bu barədə Y.Blatterin özü açıqlama verib.
O deyib ki, ilk növbədə sağlıq durumunu qaydasına salmağı və vaxtını ailəsi ilə birgə keçirməyi istəyir. Bundan başqa ali futbol qurumunun sabiq rəhbəri bir günlük radio jurnalisti kimi çalışacağını söyləyib: "Fransa Beynəlxalq Radiosu məni ölkə kuboku matçı zamanı işləməyə dəvət edib".
Y.Blatter futbol fəaliyyətini başa vurduğunu da söyləyib. O, FİFA-ya inamını mayın 27-dən - ABŞ ədliyyə orqanlarının təşkilatın işinə müdaxiləsindən sonra itirdiyini bildirib: "Həmin gün FİFA nümayəndələri mafioz struktur kimi təqdim olunmuşdular".
Qeyd edək ki, Yozef Blatter UEFA prezidenti Mişel Platiniyə qeyri-qanuni yolla 2 milyon İsveçrə frankı köçürdüyü üçün dekabrın 21-də 8 il müddətinə futboldan kənarlaşdırılıb.
