İsveçrənin Sürix şəhərində FİFA "Qızıl top-2015" mükafatlandırma mərasimi başlanıb. Sportnet.az-ın məlumatına görə, əvvəlcə ilin futbolçusu adına namizəd olan kişi və qadın futbolçular triosu səhnəyə dəvət edilib.
Ardından Puşkaş mükafatı (ən yaxşı qol) adına namizəd göstərilən qollar nümayiş etdirilib.
İlk olaraq, simvolik komanda müəyyənləşib:
Manuel Noyer, Tiaqo Silva, Marselo, Serxio Ramos, Dani Alveş - Andres İnyesta, Luka Modriç, Pol Poqba - Neymar, Lionel Messi, Kriştianu Ronaldu
Onları hazırda Türkiyənin "Antalyaspor" komandasında çıxış edən kamerunlu hücumçu Samuel Eto O mükafatlandırıb.
Daha sonra növbə Qadın futbolunda ən yaxşı baş məşqçinin mükafatlandırmasına keçib. Bu ada Jill Elyis (ABŞ) sahib olub. Kişi futbolunda ən yaxşı baş məşqçi isə Luis Enrike ("Barselona") sayılıb.
Ardından "Fair play" mükafatı sahibini tapıb. İngiltərə "Lids"inin sabiq futbolçusu Lukas Radebe qalibin adını elan edib. Bu, Almaniya yığmasının əslən qanalı sabiq futbolçusu Cerald Asamoa olub.
Ən yaxşı qolun müəllifinə verilən Ferents Puşkaş mükafatına Vendell Lira ("Vila Nova", Braziliya) sahib çıxıb.
Nəhayət, 2015-ci ilin ən yaxşı futbolçuları açıqlanıb. Ən yaxşı qadın futbolçu adına Karli Lloyd (ABŞ) yiyələnib. O, Kanadada keçirilmiş qadın futbolçular arasında dünya çempionatının qalibi olub. Lloyd Aya Miyama (Yaponiya) və Seliya Şaşiçi (Almaniya) üstələyib.
Ən yaxşı kişi futbolçu isə Lionel Messi ("Barselona", Argentina) sayılıb. Messi bu ada karyerasında 5-ci dəfə sahib olub. Bu dəfə Argentinalı hücumçu "Barselona"dakı həmklubu Neymarla "Real Madrid"in portuqaliyalı hücumçusu Kriştianu Ronaldunu geridə qoyub.
Onlara "Qızıl top" verilib.
---------------------------------------------------------------------------------------------------------------------------
12:31. 2015-ci ilin ən yaxşıları məlum olur
Bu gün dünya futbolunda 2015-ci ilin ən yaxşılarının adları açıqlanacaq. Sportnet.az-ın məlumatına görə, FİFA-nın təşkil etdiyi mərasim İsveçrənin Sürix şəhərində keçiriləcək.
Mərasimdə ilin ən yaxşı qadın və kişi futbolçusu, qadın və kişi futbolunun ən yaxşı baş məşqçisi, ilin ən yaxşı qolu, ilin 11-liyi, ilin "fair-play" mükafatı öz sahiblərini tapacaq.
"Qızıl top" mükafatı uğrunda ilk olaraq 23 futbolçunun adı açıqlansa da, sona 3 namizəd qalıb. Bunlar "Real Madrid"də çıxış edən portuqaliyalı Kriştianu Ronaldu və "Barselona"da forma geyinən argentinalı Lionel Messi ilə braziliyalı Neymardır. Ronaldu 3 dəfə (2008, 2013, 2014), Messi isə 4 dəfə (2009, 2010, 2011, 2012) bu mükafata layiq görülüb.
Digər nominasiyalar üzrə namizədlər bunlardır:
Ən yaxşı qadın futbolçu: Karli Lloyd (ABŞ), Aya Miyama (Yaponiya), Seliya Şaşiç (Almaniya).
Kişi futbolunda ən yaxşı baş məşqçi: Xosep Qvardiola ("Bavariya"), Luis Enrike ("Barselona"), Xorxe Sampaoli (Çili)
Qadın futbolunda ən yaxşı baş məşqçi: Jill Elyis (ABŞ), Mark Sampson (İngiltərə), Norio Sasaki (Yaponiya)
Puşkaş mükafatı (ən yaxşı qol): Alessandro Florensi ("Roma", İtaliya), Vendell Lira ("Qoyaneziya", Braziliya), Lionel Messi ("Barselona")
2015-ci ilin simvolik 11-liyi 4-3-3 sistemi ilə 70 ölkədən verilən 25 min səs nəticəsində müəyyənləşib.
Qapıçılar: Canluci Buffon ("Yuventus"), İker Kasilyas ("Portu"), David De Xea ("Mançester Yunayted"), Keylor Navas ("Real Madrid"), Manuel Noyer ("Bavariya").
Müdafiəçilər: David Alaba ("Bavariya"), Xordi Alba ("Barselona"), Jerom Boatenq ("Bavariya"), Daniel Karvahal ("Real Madrid"), Corco Kyellini ("Yuventus"), Dani Alveş ("Barcelona"), David Luis (PSJ), Dieqo Qodin ("Atletiko"), Mats Hummels ("Borussiya", Dortmund), Branislav İvanoviç ("Çelsi"), Vinsent Kompani ("Mançester Siti"), Filipp Lam ("Bavariya"), Marselo ("Real Madrid"), Xavyer Maskerano ("Barselona"), Pepe ("Real Madrid"), Xerard Pike ("Barselona"), Serxio Ramos ("Real Madrid"), Con Terri ("Çelsi"), Tiaqo Silva (PSJ), Rafael Varan ("Real Madrid").
Yarımmüdafiəçilər: Tiaqo Alkantara ("Bavariya"), Xabi Alonso ("Bavariya"), Serxio Buskets ("Barselona"), Eden Azar ("Çelsi"), Andres İnyesta ("Barselona"), Toni Kros ("Real Madrid"), Luka Modriç ("Real Madrid"), Andrea Pirlo ("Nyu-York Siti"), Pol Poqba ("Yuventus"), İvan Rakitiç ("Barselona"), Xames Rodriges ("Real Madrid"), David Silva ("Mançester Siti), Yaya Ture ("Mançester Siti"), Marko Verratti (PSJ), Arturo Vidal ("Bavariya").
Hücumçular: Serxio Aqüero ("Mançester Siti"), Qaret Beyl ("Real Madrid"), Kərim Benzema ("Real Madrid"), Duqlas Koşta ("Bavariya"), Kriştianu Ronaldu ("Real Madrid"), Zlatan İbrahimoviç (PSJ), Robert Levandovski ("Bavariya"), Lionel Messi ("Barselona"), Tomas Müller ("Bavariya"), Neymar (Barselona), Aryen Robben ("Bavariya"), Ueyn Runi ("Mançester Siti"), Aleksis Sançez ("Arsenal"), Luis Suarez ("Barselona"), Karlos Tevez ("Boka Xuniors").
Qeyd edək ki, mərasim Bakı vaxtı ilə saat 21:30-da başlayacaq.
